२३ IAS Transfer : बिहारमध्ये शुक्रवारी मोठा प्रशासकीय फेरबदल करण्यात आला आहे. राज्य सरकारने २३ आयएएस अधिकाऱ्यांच्या बदल्या व नव्या पदस्थापना केल्या आहेत. त्यामध्ये विधानपरिषदेचे सभापती प्रा. राम शिंदे यांचे जावई श्रीकांत खांडेकर यांचाही समावेश आहे. यासंदर्भात सामान्य प्रशासन विभागाकडून अधिकृत अधिसूचना जारी करण्यात आली आहे. प्रशासनिक कामकाज अधिक प्रभावी करण्याच्या उद्देशाने हा निर्णय घेण्यात आल्याचे सांगण्यात आले आहे. या फेरबदलात उपविकास आयुक्त (DDC), नगर आयुक्त आणि उपविभागीय अधिकारी (SDO) पदांवरील अधिकाऱ्यांचा समावेश आहे. समीर सौरभ यांची पटना येथील उपविकास आयुक्त-सह-मुख्य कार्यकारी अधिकारी या पदावरून बदली करून त्यांची कॉम्फेड, पटना येथे व्यवस्थापकीय संचालक म्हणून नियुक्ती करण्यात आली आहे. दीपक कुमार मिश्रा यांची नालंदा नगर आयुक्त पदावरून बदली करून मुख्यमंत्री सचिवालय, बिहार येथे संयुक्त सचिव म्हणून नेमणूक करण्यात आली असून, त्यांच्याकडे बिहार विकास मिशनच्या अपर संचालक पदाचा अतिरिक्त कार्यभारही राहणार आहे. तसेच विधानपरिषदेचे सभापती प्रा. राम शिंदे यांचे जावई श्रीकांत खांडेकर यांच्या खांद्यावर देखील मोठी जबाबदारी देण्यात आली आहे. डीडीसी पदांवर नव्या नियुक्त्या सभापती प्रा. राम शिंदे यांचे जावई श्रीकांत कुंडलिक खांडेकर यांची पटना जिल्ह्याचे नवे उपविकास आयुक्त (DDC) म्हणून नियुक्ती करण्यात आली आहे. शुभम कुमार यांची नालंदा, सूर्य प्रताप सिंह यांची समस्तीपूर, लक्ष्मण तिवारी यांची सारण तर गौरव कुमार यांची गोपालगंज जिल्ह्याच्या डीडीसीपदी नियुक्ती करण्यात आली आहे. याशिवाय काजले वैभव नितीन पश्चिम चंपारण, दिव्या शक्ती कैमूर, श्वेता भारती खगडिया आणि गौरव कुमार सहरसा जिल्ह्याचे उपविकास आयुक्त म्हणून पदस्थापित करण्यात आले आहेत. कृतिका मिश्रा यांची गोगरी येथून बदली करून पटना सदरच्या नव्या उपविभागीय अधिकारी (SDO) म्हणून नियुक्ती करण्यात आली आहे. आकांक्षा आनंद यांची बारसोई येथून बदली करून मुजफ्फरपूर (पश्चिम) येथे एसडीओ म्हणून नेमणूक करण्यात आली आहे. रोहित कर्दम यांची शेखपुरा येथून बदली करून नवगछिया (भागलपूर) येथील एसडीओ म्हणून नियुक्ती करण्यात आली आहे. कोण आहेत श्रीकांत खांडेकर? श्रीकांत खांडेकर हे मुळचे मंगळवेढ्यातील बावची गावातील आहेत. याच गावात त्यांचे प्राथमिक शिक्षण झाले. त्यानंतर सोलापूरात बारावीपर्यंतचे शिक्षण पूर्ण करून त्यांनी दापोली येथील कृषी विद्यापीठातून कृषी अभियांत्रिकीची पदवी प्राप्त केली आहे. त्यानंतर त्यांनी स्पर्धा परीक्षेची तयारी केली आणि ते पहिल्याच प्रयत्नात यशस्वी झाले. देशात ३३ व्या क्रमांकाने त्यांनी IAS चा टप्पा गाठला. श्रीकांत खांडेकर यांची IAS म्हणून निवड झाल्यानंतर राम शिंदे यांच्या हस्ते त्यांचा सत्कार करण्यात आला होता. त्यानंतरच शिंदे यांनी खांडेकरांना जावई म्हणून पसंत केले होते. शिंदेंची डॉक्टर कन्या अक्षता आणि श्रीकांत खांडेकर यांचा जून २०२१ मध्ये विवाह झाला आहे. खांडेकर यांना बिहार केडर मिळाल्याने ते मागील सहा वर्षांपासून तिथेच आहेत.
