नवी मुंबई : अमली पदार्थांच्या तस्करीतील गुन्हेगारांसोबत नवी मुंबई पोलिस दलातील दोन पोलिसांचे संधान आढळून आल्याने त्यांच्यावर अटकेची कारवाई करण्यात आली आहे. यासंदर्भात अन्य पोलिस कर्मचाऱ्यांची चौकशी सुरू आहे. काही दिवसांपूर्वी आत्महत्या केलेल्या बिल्डर गुरुनाथ चिंचकर यांच्या मुलाच्या अमली पदार्थ तस्करी प्रकरणातच या पोलिसांचा संबंध आढळून आला आहे. सचिन भालेराव आणि संजय फुलकर अशी अटक झालेल्या दोन पोलिसांची नावे आहेत. फुलकर हा नवी मुंबईच्या अमली पदार्थ विरोधी कक्षामध्ये, तर भालेराव हा खारघर पोलिस ठाण्यात कार्यरत आहे. याप्रकरणी आणखी काही पोलिस कर्मचाऱ्यांची चौकशी सुरू असल्याची माहिती गुन्हे शाखेचे पोलिस उपायुक्त अमित काळे यांनी दिली. पाच दिवसांपूर्वीच नवी मुंबईतील बांधकाम व्यावसायिक चिंचकर यांनी डोक्यात गोळी झाडून आत्महत्या केली होती. चिंचकर यांच्या दोन्ही मुलांचा अमली पदार्थांच्या आंतरराष्ट्रीय तस्करीत सहभाग असल्याचे पोलिसांच्या तपासात उघडकीस आले होते. गेल्या महिन्यात नवी मुंबईत दाखल झालेल्या एका गुन्ह्यात चिंचकर यांचा दुसरा मुलगा धीरज याचा सहभाग आढळून आला होता. याच प्रकरणात नवी मुंबई पोलिसांच्या गुन्हे शाखेला धीरजसोबत फुलकर व भालेराव यांचा थेट संबंध असल्याचे समजले होते. त्यांच्यातील व्हॉट्सॲप चॅटवरून याचे पुरावे मिळाल्यानंतर पोलिसांनी कारवाईचा निर्णय घेतला व गुन्हे शाखेने रविवारी दोघांना ताब्यात घेऊन त्यांची चौकशी सुरू केली. त्यानंतर रविवारी रात्री उशिरा या दोघांना अटक करण्यात आली. तर अन्य पोलिस कर्मचाऱ्यांची चौकशी सुरू आहे. या प्रकरणात नवी मुंबई पोलिसांकडून गुप्तता राखण्यात येत असून, या गुन्ह्यात आणखी काही अधिकारीही गुंतले असण्याची शक्यता व्यक्त होत आहे.
