Pawan Kalyan : चित्रपटसृष्टी आणि राजकीय वर्तुळातून एक मोठी बातमी समोर आली आहे. प्रसिद्ध दाक्षिणात्य अभिनेते आणि आंध्र प्रदेशचे उपमुख्यमंत्री पवन कल्याण यांनी पत्नी ॲना कोनिडेला यांच्यापासून विभक्त होण्याचा निर्णय घेतला आहे. तब्बल १३ वर्षांच्या वैवाहिक आयुष्यानंतर दोघांनीही परस्पर संमतीने वेगळे होण्याचा निर्णय जाहीर केला. या संदर्भात दोघांनी संयुक्त निवेदन प्रसिद्ध केले असून, त्यांच्या या निर्णयामुळे चाहत्यांना मोठा धक्का बसला आहे. विशेष म्हणजे, वैवाहिक नात्याचा शेवट झाला असला तरी आम्ही चांगले मित्र राहू, असेही त्यांनी म्हटले आहे.

तसेच मुलांच्या आनंदाला आणि भवितव्याला नेहमीच प्राधान्य देणार असून त्यांच्या संगोपनाची जबाबदारी दोघेही मिळून पार पाडणार असल्याचे त्यांनी सांगितले. या कठीण काळात आमच्या खासगी आयुष्याचा आदर करावा, अशी विनंतीही त्यांनी चाहत्यांना केली आहे.

‘तीन मार‘ चित्रपटाच्या सेटवर झाली होती पहिली भेट

पवन कल्याण आणि ॲना कोनिडेला यांची ओळख २०११ मध्ये ‘तीन मार’ या चित्रपटाच्या चित्रीकरणादरम्यान झाली होती. ॲना यांचे माहेरचे नाव ॲना लेझनेव्हा असून त्या मूळच्या रशियन नागरिक आहेत. चित्रपटाच्या सेटवर झालेल्या ओळखीचे रूपांतर पुढे प्रेमात झाले. त्यानंतर दोघांनी लग्न करण्याचा निर्णय घेतला. सप्टेंबर २०१३ मध्ये दोघे विवाहबंधनात अडकले. या दाम्पत्याला पोलेना अंजना पवनोव्हा आणि मार्क शंकर पवनोविच अशी दोन मुले आहेत.

पवन कल्याण यांचा तिसरा विवाहही मोडला!

पवन कल्याण यांच्या वैयक्तिक आयुष्यातील हा पहिलाच विभक्त होण्याचा निर्णय नाही. याआधीही त्यांचे दोन विवाह संपुष्टात आले आहेत. त्यांनी १९९७ मध्ये नंदिनी यांच्याशी पहिला विवाह केला होता. कुटुंबीयांच्या संमतीने झालेल्या या लग्नानंतर काही काळातच दोघांमध्ये मतभेद निर्माण झाले. १९९९ मध्ये ते विभक्त झाले, तर २००८ मध्ये त्यांचा कायदेशीर घटस्फोट झाला.

पहिल्या विवाहानंतर पवन कल्याण यांच्या आयुष्यात अभिनेत्री रेणू देसाई यांची एंट्री झाली. दोघांची जवळीक वाढल्यानंतर त्यांनी २००९ मध्ये विवाह केला. या दाम्पत्याला अकिरा नंदन आणि आध्या अशी दोन मुले आहेत. मात्र, त्यांचे वैवाहिक नातेही फार काळ टिकले नाही. २०१२ मध्ये दोघांचा घटस्फोट झाला.

त्यानंतर पवन कल्याण यांनी ॲना लेझनेव्हा यांच्याशी विवाह केला. आता तिसऱ्या पत्नीपासूनही विभक्त होण्याचा निर्णय घेतल्याने त्यांच्या वैयक्तिक आयुष्याची पुन्हा एकदा चर्चा सुरू झाली आहे. दरम्यान, या निर्णयामागचे कारण काय, याबाबत अद्याप कोणतीही अधिकृत माहिती समोर आलेली नाही.

Post Diwali Health: दिवाळीत भरपूर मिठाई खाल्ली? आता शरीराची काळजी घेण्यासाठी आहारात करा ‘हे’ ६ बदल; जाणून घ्या योग्य उपाय!