आयसीसी चॅम्पियन्स ट्रॉफी 2025 स्पर्धेला काही दिवस शिल्लक राहिले आहेत. स्पर्धेला 19 फेब्रुवारीपासून सुरुवात होणार आहे. या स्पर्धेत एकूण 8 संघ सहभागी होणार आहेत. तर पाकिस्तानकडे या स्पर्धेच्या यजमानपदाचा मान आहे. 2017 नंतर पहिल्यांदाच या स्पर्धेचे आयोजन केले जात आहे. त्यामुळे क्रीडाप्रेमींमध्ये आनंदाचे वातावरण आहे. मात्र त्याआधी अनेक संघांमागे दुखापतीचं ग्रहण लागलं आहे. अनेक खेळाडू जखमी झाल्याने त्यांना या स्पर्धेतून बाहेर पडावे लागले आहे.

आतापर्यंत एकूण 11 खेळाडू हे या स्पर्धेत खेळू शकणार नाहीत. या 11 पैकी 9 खेळाडूंना दुखापत झाल्याने या स्पर्धेतून माघार घ्यावी लागली आहे. तर 2 खेळाडूंचं कारण वेगळं आहे. एकाने वैयक्तिक कारण देत या स्पर्धेत खेळणार नसल्याचं सांगितलंय. तर दुसऱ्याने संघात निवड होऊनही एकदिवसीय क्रिकेटमधून तडकाफडकी निवृत्त होत असल्याचं जाहीर केले आहे. चला तर मग जाणून घेऊया कोणत्या संघाचे किती खेळाडू या स्पर्धेला मुकणार आहेत.

ऑस्ट्रेलिया – 5 खेळाडू
चॅम्पियन्स ट्रॉफीतून बाहेर पडलेल्या एकूण 11 पैकी 5 खेळाडू हे एकट्या ऑस्ट्रेलियाचे आहेत. कर्णधार पॅट कमिन्स, वेगवान गोलंदाज जोश हेझलवूड आणि ऑलराउंडर मिचेल मार्श या तिघांना दुखापतीमुळे या स्पर्धेतून बाहेर व्हावं लागलं आहे. तर मार्कस स्टोयनिस याने एकदिवसीय क्रिकेटमधून निवृत्ती जाहीर केली आहे. तर मिचेल स्टार्क याने अखेरच्या क्षणी वैयक्तिक कारणामुळे खेळू शकणार नसल्याचे स्पष्ट केले आहे.

दक्षिण आफ्रिका – 2 खेळाडू
दक्षिण आफ्रिकेच्या 2 गोलंदाजांना दुखापतीमुळ स्पर्धेतून माघार घ्यावी लागली. गेराल्ड कोएत्झी आणि एनरिच नॉर्खिया या दोघांना स्पर्धेतून माघार घ्यावी लागली.

टीम इंडिया – 1 खेळाडू
टीम इंडियाचा प्रमुख गोलंदाज जसप्रीत बुमराह याला पाठीच्या दुखापतीमुळे या स्पर्धेतून बाहेर व्हावं लागलं आहे. बुमराहचे स्पर्धेतून बाहेर जाणे टीम इंडियासाठी मोठा धक्का मानला जात आहे. त्याच्या जागी हर्षित राणाला संघात स्थान देण्यात आले आहे.

अफगाणिस्तान – 1 खेळाडू
अफगाणिस्तानचा 18 वर्षीय युवा ऑफ स्पिनर अल्लाह गजनफर याला फ्रॅक्चरमुळे आयसीसी चॅम्पियन्स ट्रॉफी 2025 आणि आयपीएल 2025 मधून बाहेर व्हावं लागलं आहे. अल्लाहला दुखापतीमुळे 4 महिने क्रिकेटपासून दूर रहावं लागणार असल्याची माहिती अफगाणिस्तान क्रिकेट बोर्डाने दिली आहे. त्यामुळे राखीव म्हणून संधी मिळालेल्या नांग्याल खरोटी याचा अल्लाहच्या जागी मुख्य संघात समावेश करण्यात आला आहे.

इंग्लंड – 1 खेळाडू
इंग्लंडचा बॅटिंग ऑलरउंडर जेकब बेथेल याला हॅमस्ट्रिंग इंजरीमुळे चॅम्पियन्स ट्रॉफीतून बाहेर व्हावं लागलं आहे. जेकबला इंडियाविरुद्धच्या एकदिवसीय मालिकेत ही दुखापत झाली होती.जेकबच्या जागी टॉम बँटनला संघात स्थान देण्यात आले आहे.

पाकिस्तान – 1 खेळाडू
पाकिस्तानचा युवा सलामीवीर सॅम अय्युब यालाही दुखापतीमुळे स्पर्धेतून माघार घ्यावी लागली.

न्यूझीलंड – 1 खेळाडू
न्यूझीलंडचा वेगवान गोलंदाज बेन सियर्स हा हॅमस्ट्रिंगच्या दुखापतीमुळे आयसीसी चॅम्पियन्स ट्रॉफी 2025 मधून बाहेर पडला आहे. त्यामुळे त्याच्या जागी जेकब डफीला संघात स्थान देण्यात आले आहे.

अशाप्रकारे ऑस्ट्रेलियाचे सर्वाधिक 5, दक्षिण आफ्रिकेचे 2 तर टीम इंडिया, पाकिस्तान, अफगाणिस्तान, इंग्लंड आणि न्यूझीलंड या संघांचे प्रत्येकी 1-1 खेळाडू या स्पर्धेतून बाहेर झाले आहेत.