Maharashtra Budget 2026 : राज्यातील तरुणांसाठी शिक्षण, कौशल्य विकास आणि क्रीडा क्षेत्रात नव्या संधी निर्माण करण्यासाठी राज्य सरकारने महत्त्वाकांक्षी योजनांची घोषणा केली आहे. या योजनांमुळे विद्यार्थ्यांना जागतिक दर्जाचे शिक्षण, परदेशातील नोकरीच्या संधी आणि उद्योजकतेसाठी मोठे प्रोत्साहन मिळणार आहे. नवी मुंबईत सहा देशांच्या सहभागातून आकाराला येणारे एज्युसिटी हे आंतरराष्ट्रीय विद्यापीठ केंद्र या वर्षापासूनच कार्यान्वित होत असून, याच धर्तीवर राज्यात आणखी १० शैक्षणिक शहरे विकसित करण्याचा निर्णय घेण्यात आला आहे. यामुळे जागतिक दर्जाचे शिक्षण आता महाराष्ट्रातच उपलब्ध होणार आहे. परदेशातील नोकरीच्या संधी शोधणाऱ्या तरुणांसाठी महिमा (महाराष्ट्र एजन्सी फॉर होलिस्टिक इंटरनॅशनल मोबिलिटी अँड अॅडव्हान्समेंट) या संस्थेची स्थापना करण्यात आली आहे. या माध्यमातून परदेशी भाषांचे प्रशिक्षण, कौशल्य विकास आणि आर्थिक मार्गदर्शन एकाच छताखाली मिळणार आहे. तसेच, विद्यार्थ्यांमध्ये वैज्ञानिक दृष्टिकोन रुजवण्यासाठी मुख्यमंत्री विज्ञान वारी सुरू करण्यात आली असून, निवडक विद्यार्थ्यांना थेट इस्रो आणि अमेरिकेतील नासा यांसारख्या नामवंत संस्थांना भेट देता येणार आहे. राज्यातील उद्योजकता आणि स्टार्टअप परिसंस्थेला बळ देताना, आगामी पाच वर्षांत १.२५ लाख नवे उद्योजक घडवण्याचे उद्दिष्ट ठेवण्यात आले आहे. ५० हजार स्टार्टअप्सना पाठबळ देण्यासाठी मुख्यमंत्री उद्योजकता महाफंड उभारला असून, विशेष म्हणजे सर्वोत्कृष्ट ५० स्टार्टअप्सना थेट शासनाच्या प्रकल्पांमध्ये काम करण्याची संधी दिली जाणार आहे. क्रीडा क्षेत्रात महाराष्ट्राचा दबदबा निर्माण करण्यासाठी मिशन लक्ष्यवेध अंतर्गत १२ प्रमुख खेळांवर लक्ष केंद्रित करण्यात आले आहे. राज्यात सध्या कार्यरत असलेल्या ८ हायपरफॉर्मन्स सेंटर्समध्ये आता आणखी ४ केंद्रांची भर पडणार आहे. विभागीय स्तरावर २५ क्रीडा उत्कृष्टता केंद्रे आणि जिल्हा स्तरावर ९६ क्रीडा गुणवत्ता विकास केंद्रे सुरू केली जाणार आहेत.
