Om Box Office Collection : पहिल्याच दिवशी दमदार सुरुवात; धनुषच्या चित्रपटाने जिंकली प्रेक्षकांची मनं, केली ‘इतक्या’ कोटींची कमाई
Om Box Office Collection : प्रदर्शनापूर्वीच या चित्रपटाची सोशल मीडियावर जोरदार चर्चा रंगली होती. आता बॉक्स ऑफिसवरही चित्रपटाने दमदार सुरुवात केली आहे.

Om Box Office Collection : धनुषचा बहुप्रतीक्षित स्पाय-ॲक्शन-थ्रिलर चित्रपट ‘ओम: ऑपरेशन मोल’ २० नोव्हेंबर रोजी देशभरातील चित्रपटगृहांमध्ये प्रदर्शित झाला आहे. राजकुमार पेरियासामी यांनी दिग्दर्शित केलेल्या या चित्रपटात धनुषसोबत ममूटी, साई पल्लवी, श्रीलीला आणि नसीरुद्दीन शाह यांच्या महत्त्वपूर्ण भूमिका आहेत.
प्रदर्शनापूर्वीच या चित्रपटाची सोशल मीडियावर जोरदार चर्चा रंगली होती. आता बॉक्स ऑफिसवरही चित्रपटाने दमदार सुरुवात केली आहे. सॅकनिल्कच्या (Sacnilk) आकडेवारीनुसार, ‘ओम: ऑपरेशन मोल’ने पहिल्याच दिवशी भारतात तब्बल १६.४२ कोटी रुपयांचे नेट कलेक्शन केले आहे. विशेष म्हणजे, धनुषच्या कारकिर्दीतील ही आतापर्यंतची सर्वात मोठी देशांतर्गत ओपनिंग ठरली आहे.
चित्रपटाच्या भाषानिहाय कमाईचा विचार केला, तर तमिळमध्ये १२.१९ कोटी, तेलगूमध्ये ३.८३ कोटी आणि हिंदीमध्ये ४० लाख रुपयांची कमाई झाली आहे. धनुषच्या यावर्षी प्रदर्शित झालेल्या ‘कारा’ या चित्रपटाच्या तुलनेत ‘ओम: ऑपरेशन मोल’ने दुपटीहून अधिक कमाई करत बॉक्स ऑफिसवर आपली ताकद दाखवून दिली आहे.
याआधी धनुषच्या ‘रायान’ आणि ‘कुबेरा’ या तमिळ चित्रपटांनी अनुक्रमे १३.६५ कोटी आणि १४.७५ कोटी रुपयांची पहिल्या दिवसाची कमाई केली होती. तर त्याचा यापूर्वीचा सर्वाधिक ओपनिंगचा विक्रम ‘तेरे इश्क में’ या हिंदी चित्रपटाच्या नावावर होता. या चित्रपटाने पहिल्या दिवशी १६ कोटी रुपयांची कमाई केली होती. आनंद एल. राय दिग्दर्शित या चित्रपटात धनुषसोबत क्रिती सॅनॉन झळकली होती.
यंदाच्या तमिळ चित्रपटांच्या बॉक्स ऑफिस कामगिरीशी तुलना केली असता ‘ओम: ऑपरेशन मोल’ने सूर्याच्या ‘करुप्पू’ला मागे टाकले आहे. ‘करुप्पू’ने पहिल्या दिवशी १५.५० कोटी रुपयांचा व्यवसाय केला होता. मात्र, सूर्याच्या १९.१५ कोटी रुपयांच्या ओपनिंगचा विक्रम धनुषला मोडता आलेला नाही. याशिवाय ‘जेलर २’ने ५९ कोटी, तर ‘जना नायकन’ने ४२ कोटी रुपयांची दमदार ओपनिंग केली होती.
येत्या काही दिवसांत किती कमाई करणार याकडे लक्ष
दरम्यान, ‘ओम: ऑपरेशन मोल’ला प्रेक्षक आणि समीक्षकांकडून संमिश्र प्रतिसाद मिळत आहे. त्यामुळे आगामी वीकेंडमध्ये चित्रपटाच्या कमाईत आणखी वाढ होण्याची शक्यता वर्तवली जात आहे. सध्या बॉक्स ऑफिसवर या चित्रपटाची पवन सादिनेनी आणि दुल्कर सलमान अभिनीत ‘आकाशमलो ओका तारा’ या चित्रपटाशी स्पर्धा सुरू आहे. त्यामुळे येत्या काही दिवसांत ‘ओम: ऑपरेशन मोल’ किती कमाई करतो, याकडे सर्वांचे लक्ष लागले आहे.
Winter Travel: हिवाळ्यात फिरण्याचा प्लॅन करताय? उत्तर भारतातील ‘या’ ७ ठिकाणांना नक्की द्या भेट!





