पानशेत : पानशेतजवळील निगडे मोसे (ता. राजगड) येथील छत्रपती शिवाजी महाराज शिल्पसृष्टी येथे शुक्रवारी (६ नोव्हेंबर) आदिवासी बांधवांसाठी दिवाळी आनंदोत्सव सोहळ्याचे आयोजन करण्यात आले होते. या सोहळ्यात ५० हून अधिक आदिवासी महिला आणि मुलांनी उत्स्फूर्त सहभाग घेतला. पुणे जिल्हा नियोजन समितीचे माजी सदस्य अशोक मते आणि त्यांच्या परिवाराच्या वतीने या कार्यक्रमाचे आयोजन करण्यात आले होते.

मुख्यमंत्री देवेंद्र फडणवीस यांनी केलेल्या आवाहनाला प्रतिसाद देत दुष्काळग्रस्त भागातील आदिवासी बांधव आणि कष्टकरी शेतकरी महिलांची दिवाळी गोड करण्याचा उपक्रम अशोक मते यांच्या पुढाकारातून राबविण्यात आला. यावेळी आदिवासी कुटुंबांना दिवाळीनिमित्त मिठाई, फराळ आणि दैनंदिन गरजेच्या वस्तूंचे वाटप करण्यात आले.

विशेष म्हणजे, आदिवासी पाड्यांमध्ये घरोघरी जाऊन कातकरी बांधवांना दिवाळीच्या भेटवस्तू देण्यात आल्या. त्यामुळे आदिवासी कुटुंबांच्या चेहऱ्यावर आनंद पाहायला मिळाला.

छत्रपती शिवाजी महाराज आणि छत्रपती संभाजी महाराज यांच्या प्रतिमांचे पूजन करून कार्यक्रमाची सुरुवात करण्यात आली. या आनंदोत्सवात आदिवासी महिला, मुली आणि इतर समाजातील महिलांनीही सहभाग घेतला. सामाजिक सलोखा आणि बंधुभाव जपत दिवाळीचा आनंद सर्वांपर्यंत पोहोचवण्याचा संदेश या उपक्रमातून देण्यात आला.