Pune News : शहरातील ससून रुग्णालयात सोमवारी संध्याकाळी मेल जनरल वॉर्डमध्ये लागलेल्या आगीमुळे काही काळ धावपळ उडाली. मात्र रुग्णालय प्रशासन, सुरक्षा रक्षक आणि अग्निशमन दलाच्या तत्परतेमुळे मोठा अनर्थ टळला. या घटनेत कोणतीही जीवितहानी किंवा जखमी झाल्याची नोंद नाही. मिळालेल्या माहितीनुसार, ससून रुग्णालयातील ग्राउंड प्लस दोन मजली इमारतीच्या ग्राउंड फ्लोअरवरील मेल जनरल वॉर्डमधील सिस्टर रूममध्ये असलेल्या पोटमाळ्यावर आग लागली. त्या ठिकाणी वॉर्डसाठी लागणारे साहित्य ठेवण्यात आले होते. यामध्ये पुस्तके, रजिस्टर, काही औषधे तसेच व्हीलचेअर यांसारख्या वस्तूंचा समावेश होता. आग लागल्याचे लक्षात येताच तेथील सुरक्षा रक्षक आणि रुग्णालयातील कर्मचाऱ्यांनी तत्काळ एबीसीडी प्रकारच्या फायर एक्स्टिंग्विशरचा वापर करून आग विझवण्याचा प्रयत्न सुरू केला. दरम्यान, घटनेची माहिती मिळताच अग्निशमन दलाचे पथक घटनास्थळी दाखल झाले. घटनावेळी वॉर्डमध्ये सुमारे ७० रुग्ण उपचार घेत होते. सुरक्षा कर्मचारी व स्टाफ यांच्या मदतीने सर्व रुग्णांना तातडीने सुरक्षित ठिकाणी हलवण्यात आले. आगीमुळे काही प्रमाणात धूर पसरला होता. त्यामुळे धूर बाहेर काढण्यासाठी वेंटिलेशन तसेच एक्झॉस्ट ब्लोअरचा वापर करण्यात आला. यानंतर अग्निशमन दलाने पाण्याची लाईन तयार करून जेट व स्प्रेच्या साह्याने आगीवर पूर्णपणे नियंत्रण मिळवले. सुदैवाने या घटनेत कोणतीही जखमी किंवा जीवितहानी झालेली नाही. आग विझवण्याचे काम पूर्ण झाल्यानंतर अग्निशमन दलाचे पथक परतले असून, आगीचे नेमके कारण अद्याप स्पष्ट झालेले नाही. या घटनेची अधिक चौकशी सुरू आहे.
