Neelam Gorhe – नसरापुरात चिमुकलीवर झालेल्या अत्याचार, निर्घृण हत्येने राज्यभर संताप व्यक्त होत असताना, शिवसेना नेत्या, विधानपरिषद उपसभापती डॉ. नीलम गोऱ्हे यांनी पीडित कुटुंबाची भेट घेऊन सांत्वन केले. आईच्या हंबरड्याने मन हेलावलं. चिमुकलीला न्याय मिळवून देण्यासाठी लढा शेवटपर्यंत सुरू राहील, असे त्यांनी भेटीनंतर सांगितले.

बालहक्क आयोगाने अधिक जबाबदारीने काम करण्याची गरज असून योग्य कागदपत्रांसह प्रकरणाचा पाठपुरावा करण्याचे निर्देश दिल्याचे त्यांनी सांगितले. उपमुख्यमंत्री एकनाथ शिंदे यांनी कुटुंबाशी संवाद साधून त्यांना धीर दिला असून, सरकार कुटुंबाच्या पाठीशी ठामपणे उभे असल्याचे त्यांनी स्पष्ट केले. न्याय मिळवून देणे तसेच कुटुंबाचे संरक्षण- पुनर्वसन करणे ही सरकारची बांधिलकी असल्याचे त्या म्हणाल्या.

सोशल मीडियावर पीडितेची ओळख उघड करणारे फोटो किंवा संदेश प्रसारित करणे हे पॉक्सो कायदा अंतर्गत गंभीर गुन्हा असल्याचे त्यांनी स्पष्ट केले. नागरिकांनी असे संदेश तात्काळ हटवावेत, असे आवाहनही त्यांनी केले.या घटनेला जातीय किंवा धार्मिक रंग देण्याचा प्रयत्न करणाऱ्यांवर त्यांनी टीका केली. न्याय हा धर्म किंवा जात पाहून होत नाही. सर्व समाज एकत्र येऊन कुटुंबाच्या पाठीशी उभा आहे, हेच खरे चित्र आहे, असे सांगून त्या म्हणाल्या.

काही घटकांकडून पीडित कुटुंबाला आंदोलनात सहभागी होण्यासाठी प्रवृत्त केल्याची घटना अयोग्य आहे. दुःखात असलेल्या कुटुंबावर आंदोलनासाठी दबाव टाकणे अमानुष आहे. राज्यात महिलांविरोधातील गुन्ह्यांच्या जलद सुनावणीसाठी फास्टट्रॅक न्यायालयांची संख्या वाढवण्याची गरज आहे. अपेक्षित १३८ न्यायालयांपैकी ४० कार्यरत असून उर्वरित न्यायालये तातडीने सुरू करण्यासाठी मुख्यमंत्री देवेंद्र फडणवीस व उपमुख्यमंत्री एकनाथ शिंदे यांच्याकडे पाठपुरावा करणार असल्याचे त्यांनी स्पष्ट केले.