पिंपरी, दि. 23 – शालेय, आंतरशालेय, शहर, जिल्हा, राज्य आणि राष्ट्रीय स्तरावरील उपक्रमांमध्ये विद्यार्थ्यांचा सहभाग वाढवण्यासाठी पिंपरी-चिंचवड महापालिकेने जल्लोष शिक्षणाचा 2023 हा नाविण्यपूर्ण उपक्रम सुरू केला आहे. चिंचवड विधानसभा पोटनिवडणुकीची आचारसंहिता असली तर निवडणूक आयोगाची विशेष परवानगी घेऊन हा कार्यक्रम पार पाडण्यात येणार असल्याची माहिती अतिरिक्त आयुक्त प्रदीप जांभळे यांनी सोमवार (दि.23) रोजी दिली.
महापालिकेत झालेल्या पत्रकार परिषदेला शिक्षण विभागाचे उपायुक्त संदीप खोत यांच्यासह आदी अधिकारी उपस्थित होते. विद्यार्थ्यांच्या कलागुणांना प्रदर्शित करण्यासाठी तसेच शाळेच्या मानकांचे आणि सर्वोत्तम पद्धतींचे मूल्यमापन करण्याच्या उद्देशाने आयोजित केला जाणारा हा दोन दिवसीय मेगा बोनान्झा 24 आणि 25 जानेवारी 2023 रोजी ऑटो क्‍लस्टर एक्‍झिबिशन सेंटर येथे आयोजित केला जाईल.
अतिरिक्त आयुक्त प्रदीप जांभळे म्हणाले,आमच्या विद्यार्थ्यांमध्ये अफाट प्रतिभा आहे आणि त्यांनी केवळ शैक्षणिकच नव्हे तर क्रीडा, कला, नाटक, हस्तकला, तंत्रज्ञान, डिझाइनमध्येही प्राविण्य मिळवावे ही आमची इच्छा आहे. सहभागी शाळांवर आमचे लक्ष असेल. सॉफ्ट इन्फ्रास्ट्रक्‍चर,एक्‍सटर्नल कॉलॅबोरेशन, शिक्षक प्रशिक्षण इत्यादीसह विविध निकषांवर सहभागी शाळा आणि विद्यार्थ्यांचे शैक्षणिक मूल्यमापन केले जाईल. आमच्या उपक्रमांद्वारे कल्पनांचे हस्तांतरण आणि मुलांचा सर्वांगीण विकास करण्याचा हा एक अनोखा प्रयत्न असेल.
पिंपरी-चिंचवडमध्ये प्रथमच जल्लोष शिक्षणाचा कार्यक्रम आयोजित करण्यात येत असून सर्व विद्यार्थ्यांसाठी ही कौशल्ये प्रदर्शित करण्याची, नवविचार करण्याची, तयार करण्याची, डिझाइन बनवण्याची, अपेक्षा साध्य करण्याची, क्षमता विकसित करण्याची सुवर्ण संधी आहे. जल्लोष शिक्षणाचा 2023 मध्ये पीसीएमसी मधील 129 शाळेंतील विद्यार्थ्यांचा सहभाग दिसेल. एकदा नोंदणी प्राप्त झाल्यानंतर पहिल्या टप्प्यातील टीम निवडीची सुरुवात झाली जी शालेय स्तरावर आणि शहर पातळीवर पार पडली. प्रत्येक झोनमधील एक सर्वोत्कृष्ट शाळा ओळखण्यासाठी शालेय आव्हानांच्या निकषांवर एक सर्वसमावेशक रेटिंग प्रणाली तयार केली गेली आहे. नंतर याला मॉडेल स्कूल ऑफ झोनमध्ये रूपांतरित केले जाईल. 8 मॉडेल स्कूल्स तयार करण्याचे पीसीएमसीचे उद्दिष्ट आहे.
