न्यूयॉर्क : भारत आणि चीन यांच्यातील तणावाचा परिणाम म्हणून भारताने टिकटॉकसह ५९ चिनी अॅप्सवर बंदी घेतली आहे. भारताच्या या कृतीचे अनुकरण आता अमेरिकादेखील ही बंदी घालण्याच्या तयारीत असल्याचे सांगण्यात येत आहेत. अमेरिकेचे परराष्ट्र मंत्री माइक पोम्पिओ यांनी अमेरिका चिनी अॅप्सवर बंदी घालण्याचा विचार करत असल्याची माहिती दिली आहे. एका वृत्तवाहिनीशी बोलताना त्यांनी ही माहिती दिली आहे. लडाख सीमेवरील धुमश्चक्रीनंतर चीनसोबत निर्माण झालेल्या तणावाच्या पार्श्वभूमीवर भारत सरकारने २९ जून रोजी टिकटॉक, शेअरइट, ब्युटी प्लस या लोकप्रिय चिनी अॅपसह एकूण ५९ अॅपवर बंदी घातली आहे.
एका इंग्रजी वर्तमानपत्राने दिलेल्या वृत्तानुसार, माइक पोम्पिओ यांनी अमेरिका टिकटॉकसह चिनी अॅप्सवर बंदी घालण्याचा विचार करत असल्याचे सांगितले आहे. आत्ता या विषयावर अध्यक्ष डोनाल्ड ट्रम्प यांच्याशी चर्चा झालेली नाही, काही ठरलेले नाही. परंतु ही बाब अशी आहे की आम्ही निश्चितच विचार करत आहोत, असे माइक पोम्पिओ यांनी एका वृत्तवाहिनीला दिलेल्या मुलाखतीत म्हटले आहे.
केंद्र सरकारने टिकटॉक, शेअरइट, ब्युटी प्लस या लोकप्रिय चिनी अॅपसह एकूण ५९ अॅपवर बंदी घातली आहे. वापरकर्त्यांची माहितीचोरी, तिचा गैरवापर, राष्ट्रीय सुरक्षेला धोका आणि नागरिकांची मागणी यांच्या आधारे बंदी घालण्यात आल्याचे माहिती तंत्रज्ञान खात्याने निवेदनाद्वारे स्पष्ट केलं. देशाच्या राष्ट्रीय सुरक्षेला धोकादायक असलेले घटक या माहितीचा गैरवापर करीत असून त्याद्वारे देशाची एकात्मता आणि सार्वभौमत्वाला धक्का पोहोचत आहे. ही अतिशय गंभीर आणि चिंताजनक बाब असून त्यावर तातडीने उपाययोजना करणे आवश्यक आहे, असे केंद्रीय प्रसारण मंत्रालयाने बंदीचे आदेश जारी करताना म्हटले होते.