Bengal CM News: पश्चिम बंगालमधील विधानसभा निवडणुकीच्या निकालानंतर आता सर्वांचे लक्ष मुख्यमंत्री पदाच्या निवडीकडे लागले आहे. राज्यात भाजपचे सरकार स्थापन होणार असून, ९ मे रोजी (शनिवार) शपथविधी सोहळा पार पडणार आहे. मात्र, अद्याप मुख्यमंत्री पदाचा चेहरा निश्चित झालेला नाही. सूत्रांच्या माहितीनुसार, भाजप बंगालमध्ये एखाद्या महिला नेत्याकडे राज्याची धुरा सोपवण्याची दाट शक्यता आहे. दिल्लीत खलबते सुरू; अमित शाह यांच्यावर मोठी जबाबदारी – (Bengal CM News) मुख्यमंत्री निवडीसाठी भाजपमध्ये बैठकांचे सत्र सुरू झाले आहे. पंतप्रधान नरेंद्र मोदी, केंद्रीय गृहमंत्री अमित शाह आणि भाजपचे राष्ट्रीय अध्यक्ष नितीन नवीन यांच्यात आगामी एक-दोन दिवसांत महत्त्वाची बैठक पार पडणार आहे. विशेष म्हणजे, भाजपने विधिमंडळ पक्षनेता निवडण्यासाठी केंद्रीय गृहमंत्री अमित शाह यांची ‘केंद्रीय निरीक्षक’ म्हणून नियुक्ती केली आहे. ‘या’ महिला नेत्यांच्या नावांची जोरदार चर्चा – ( Bengal CM News) बंगालमध्ये तृणमूलच्या ममता बॅनर्जी यांना शह देण्यासाठी भाजप महिला कार्ड वापरण्याची शक्यता आहे. यामध्ये दोन नावे आघाडीवर आहेत. अग्निमित्रा पॉल: आसनसोल दक्षिण मतदारसंघातून तृणमूलच्या तापस बॅनर्जी यांचा ४०,८३९ मतांनी पराभव करणाऱ्या अग्निमित्रा पॉल सध्या चर्चेत आहेत. प्रसिद्ध फॅशन डिझायनर असलेल्या पॉल 2019 मध्ये भाजपमध्ये सामील झाल्या. २०२१ मध्ये त्यांनी सयोनी घोष यांचा पराभव केला होता. सध्या त्या बंगाल भाजपच्या उपाध्यक्ष पदाची जबाबदारी सांभाळत आहेत. रुपा गांगुली: ‘महाभारत’ मालिकेत द्रौपदीची भूमिका साकारून घराघरांत पोहोचलेल्या रुपा गांगुली यांनी सोनारपुर दक्षिण मतदारसंघातून ३५ हजार मताधिक्याने विजय मिळवला आहे. २०१६ ते २०२२ या काळात त्या राज्यसभा खासदार होत्या. गेल्या १० वर्षांपासून त्या पक्षात सक्रिय असून त्यांची प्रतिमा जनमानसात अत्यंत प्रभावी आहे. शुभेंदू अधिकारींसह ‘हे’ दिग्गजही शर्यतीत – नंदीग्राम आणि भवानीपूरमध्ये वर्चस्व गाजवणारे शुभेंदू अधिकारी हे मुख्यमंत्री पदाचे प्रबळ दावेदार मानले जात आहेत. त्यांना दिल्लीत पाचारण करण्यात आले आहे. त्यांच्याव्यतिरिक्त खालील नावांचीही चर्चा आहे. शमिक भट्टाचार्य: प्रदेशाध्यक्ष, पश्चिम बंगाल भाजप. दिलीप घोष: माजी प्रदेशाध्यक्ष. उत्पल महाराज: आरएसएस (RSS) मधील प्रभावशाली चेहरा. शपथविधीची तयारी जोरात – ९ मे रोजी होणाऱ्या शपथविधीपूर्वी भाजप हायकमांड कोणाच्या नावावर शिक्कामोर्तब करते, याकडे संपूर्ण देशाचे लक्ष लागले आहे. बंगालमध्ये प्रथमच भाजपचा मुख्यमंत्री विराजमान होणार असल्याने हा सोहळा ऐतिहासिक ठरण्याची शक्यता आहे.