शिक्षण समितीचे सभापतिपद कोणाला ?

सोमवारी फैसला :  इच्छुकांमध्ये जोरदार रस्सीखेच

पिंपरी  – पिंपरी-चिंचवड महापालिकेच्या शिक्षण समिती सभापतिपदासाठी येत्या सोमवारी (दि. 5) दुपारी तीन ते पाच या वेळेत अर्ज भरायचे आहेत. त्यामुळे अर्ज भरल्यानंतर लगेच सभापती कोण होणार हे स्पष्ट होणार असून सभापतिपदाची प्रत्यक्ष निवडणूक 9 ऑगस्ट रोजी दुपारी बारा वाजता होणार आहे.

पक्षीय बलाबलानुसार सत्ताधारी भाजपच्या चंदा लोखंडे, सागर गवळी, निर्मला गायकवाड, मनीषा पवार, शशिकांत कदम, राष्ट्रवादी कॉंग्रेसच्या वैशाली काळभोर, सुलक्षणा धर, भाऊसाहेब भोईर आणि शिवसेनेच्या रेखा दर्शले अशा नऊ सदस्यांची 25 जुलै रोजी झालेल्या महासभेत निवड करण्यात आली आहे. समितीत भाजपचे वर्चस्व असल्याने सभापती, उपसभापती भाजपचा होणार हे निश्‍चित आहे. पुण्याचे विभागीय आयुक्त डॉ. दीपक म्हैसेकर यांनी शिक्षण समिती सभापतिपदाचा निवडणूक कार्यक्रम जाहीर केला आहे.

त्यानुसार येत्या सोमवारी (दि. 5) दुपारी तीन ते सायंकाळी पाच या वेळेत नामनिर्देशन पत्रे स्वीकारली जाणार आहेत. 9 ऑगस्ट रोजी दुपारी बारा वाजता महापालिकेतील महापौर मधुकरराव पवळे सभागृहात निवडणूक होईल. निवडणूक निर्णय अधिकारी म्हणून पुणे महापालिकेच्या अतिरिक्त आयुक्त रुबल अग्रवाल कामकाज पाहणार आहेत.

डिजिटल प्रभातचे टेलिग्राम जॉईन करण्यासाठी येथे क्लिक करा

You might also like

Leave A Reply

Your email address will not be published.