बगदाद – गेल्या काही महिन्यांपासून रशिया-युक्रेन युद्ध सुरु आहे. अशातच आता इराणकडून इराकच्या उत्तर भागामध्ये क्षेपणास्त्रांचा हल्ला करण्यात आला असून या हल्ल्यात किमान एकजण ठार तर 8 जण जखमी झाल्याचे वृत्त आहे. इराणकडून इराकमधील एखाद्या भागावर अलिकडच्या काही आठवड्यात क्वचितच क्षेपणास्त्रांचा हल्ला करण्यात आला आहे.
इराणने इराकमधील कुर्दिश गटाला लक्ष्य करण्यासाठी हा क्षेपणास्त्रांचा हल्ला केल्याचे समजते आहे. इराकमधील उत्तरेकडील काही भागावर कुर्दिश बंडखोरांचे नियंत्रण आहे. या हल्ल्यातील मृतांची संख्या वाढण्याची भीती या भागातील आरोग्य मंत्र्याने व्यक्त केली आहे.
इराणमधील रिव्होल्युशनरी गार्डने या हल्ल्याच्या वृत्ताला दुजोरा दिला आहे. इराकमच्या उत्तरेकडील भागांमधील दहशतवाद्यांच्या तळांवर ड्रोन आणि क्षेपणास्त्रांनी हल्ले करण्यात आल्याचे इराणच्या वृत्तसंस्थेने म्हटले आहे.
कुर्दिश पंतप्रधान मसरूर बारझानी यांनी इराणच्या या हल्ल्याचा निषेध केला आहे. हा हल्ला म्हणजे इराक आणि कुर्दिश सार्वभौमत्वाचे उल्लंघन असल्याचे त्यांनी म्हटले आहे. इराकमधील संयुक्त राष्ट्राच्या दूतावासानेही या हल्ल्याचा निषेध केला आहे. आपापसातील संघर्षावर इराण आणि इराककडून सामोपचाराने तोडगा काढणे हा एकमेव उपाय असल्याचे संयुक्त राष्ट्राच्या दूतावासाने म्हटले आहे.