मुंबई : केंद्र सरकारच्या नव्या कृषी कायद्यांविरोधात शेतकऱ्यांचे मागील दोन महिन्यांपासून आंदोलन सुरू आहे. शेतकरी आंदोलनावर इंटरनॅशनल पॉपस्टार रिहानाने ट्विट केले आणि त्यानंतर देशभराचत ट्विटर युद्ध पाहायला मिळालं.
रेहानाच्या ट्विटनंतर खेळाडू, बॉलिवूड कलाकारांनी ट्विट करत, भारताला विभागण्याचा प्रयत्न होत असून, तसे होऊ देऊ नका असं आवाहन सेलिब्रेटींनी केले होते. यामध्ये माजी क्रिकेटपटू सचिन तेंडुलकरचा समावेस होता. मात्र या ट्विटमुळे सचिनच्या अडचणी वाढण्याची शक्यता आहे. विविध संघटनांकडून सचिनला धारेवर धरण्यास सुरू केले आहे.
आता स्वाभिमानी शेतकरी संघटनेच्या कार्यकर्त्याने आमच्या शेतकरी बापासाठी कधी ट्वीट करशील? असं म्हणत सचिन तेंडुलकरच्या घराबाहेर ठिय्या दिला आहे. स्वाभिमानी शेतकरी संघटनेचा प्रदेश प्रवक्ता रणजीत बागल याने सचिनच्या घराबाहेर एक पोस्टर घेऊन थेट जाब विचारला आहे. यावेळी रणजीत बागल याला सचिनच्या बंगल्यातील सुरक्षारक्षकाने हटकले. तसेच येथून जाण्याच्या सूचना केल्या.
आंतरराष्ट्रीय सेलिब्रेटींनी शेतकरी आंदोलनावर प्रतिक्रिया दिल्यानंतर भारताच्या अंतर्गत बाबींवर लक्ष न देण्याचा सल्ला भारतीय सेलिब्रेटींनी दिला होता. यामध्ये सचिन तेंडुलकर याचाही समावेश होता. ‘देशाच्या सार्वभौमत्वाशी कधीही तडजोड केली जाणार नाही. बाहेरच्या शक्तींनी याकडे दुरूनच पाहावं, अंतर्गत प्रकरणात हस्तक्षेप करु नये. भारतीयांना आमचा भारत चांगला माहिती आहे आणि आम्ही आमच्या देशाचं भलं जाणतो. चला देश म्हणून एकत्र येऊ या’, असं ट्विट सचिननं केलं होतं.