अन्य आजारांवर उपचार घेताना करोना प्रादुर्भाव रोखण्यासाठी सुरक्षितता गरजेची
– सागर येवले
पुणे – लॉकडाऊन शिथिल झाले आणि मागील तीन महिन्यांपासून घरात थांबून उपचार घेत असलेल्या रुग्णांकडून डॉक्टरांची वेळ मागितली जात आहे. कारण, अनेक दिवसांपासून सहन केलेल्या आजारावर लवकर उपचार व्हावे, पुढे ढकलेली शस्त्रक्रिया व्हावी यासाठी प्रयत्न सुरू आहे. साहजीकच यामुळे रुग्णालयांमध्ये गर्दी वाढणार असून, करोनाच्या पार्श्वभूमीवर नागरिकांनी रुग्णालयात गेल्यावर प्रामुख्याने नाका-तोंडाला मास्क आणि सुरक्षित अंतर हे दोन नियम पाळावे, असे आवाहन तज्ज्ञ डॉक्टरांकडून करण्यात आले आहे.
जिल्ह्यासह शहरात करोना प्रादुर्भाव दिवसेंदिवस वाढतच आहे. नायडू आणि ससून रुग्णालयासह सर्वच खासगी रुग्णालयांमध्ये करोनाबाधितांवर उपचार सुरू आहेत. बहुतांश रुग्णालयांनी स्वतंत्र कोविड वॉर्ड तयार केले असून अन्य आजाराच्या रुग्णांना वेगळ्या वॉर्डमध्ये उपचार दिले जात आहेत. करोनाचा प्रादुर्भाव वाढू नये याची रुग्णालय प्रशासनाकडून पुरेपूर काळजी घेतली जात आहे. मात्र, काही जणांच्या हलगर्जीपणा आणि बेजाबदार नियोजनामुळे “अन्य आजारांसाठी रुग्णालयात आलेले काही रुग्ण आठ दिवसांनी करोना पॉझिटिव्ह निघत असल्याचे दिसून आले, अशा परिस्थितीत मागील तीन महिन्यांपासून अत्यंत गरजेच्या रुग्णसेवा सोडल्या तर अन्य शस्त्रक्रिया, उपचार पुढे ढकलण्यात आले होते.
परंतु किती दिवस सहन करणार, आजार बळावला तर जीवावर बेतू शकते, या भीतीने रुग्ण आता डॉक्टरांशी संपर्क करीत आहेत. “डॉक्टर साहेब कधी येऊ, तेवढे ऑपरेशन करून टाकू, म्हणजे मला बरे तरी वाटेल.’ “अजून किती दिवस औषधे खायची’, कधी येऊ भेटायला.’ अशी विचारणा केली जात आहे. मात्र, काही डॉक्टरांकडून थोडे दिवस थांबण्याचा सल्ला दिला जात आहे. तर, ज्यांची तत्काळ शस्त्रक्रिया किंवा उपचार करणे आवश्यक आहे त्यांना रुग्णालयात गर्दी होणार नाही याचा विचार करून वेळ दिली जात आहे. मात्र, नागरिकांनी घरातून बाहेर पडल्यापासून रुग्णालयात आणि त्यानंतर घरी येताना विशेष काळजी घ्यावी. त्यामध्ये लहान मुले आणि ज्येष्ठ नागरिकांनी आवश्यकता नसेल तर घराबाहेर पडू नये, असे आवाहन आरोग्य विभागाकडून केले आहे.
रुग्णालयातून घरी आल्यावर…
– बूट किंवा चप्पल घराबाहेर काढावी; नंतर सॅनिटाईझ केली तर उत्तम.
– स्वत:ला आणि आपल्याबरोबर असलेली पिशवी बाहेरच सॅनिटाईझ करावी.
– घरात गेल्यानंतर इतरत्र न बसता थेट बाथरूमध्ये जावे.
– सर्व कपडे गरम पाण्यात भिजत टाकून अंघोळ किंवा साबणाने स्वच्छ हात, पाय, तोंड धुवावेत.
– घरात लहान मुलं किंवा वृध्द व्यक्ती असल्यास त्यांच्यापासून काहीवेळ दूर रहावे.
– अंघोळ झाल्यावर पाण्यात डेटॉल टाकून बाथरूम निर्जंतुकीकरण करून घ्यावे.
– आपण वापरलेला टॉवेल इतरत्र न टाकता उन्हात वाळत टाकावा.
रुग्णालयात काय खबरदारी घ्यावी…
– रुग्णालयात प्रवेश करण्याअधी नाका-तोंडाला मास्क लावावा.
– नाक, तोंड, कान, डोळे याला स्पर्श करू नये.
– गर्दी असेल त्याठिकाणी थांबू नये.
– सॅनिटायझरने वेळोवेळी हात स्वच्छ करावेत.
– रुग्णालयातील दार, बेंच, खुर्ची किंवा अन्य कोणत्याही ठिकाणी हात लावू नये.
– कोणी मास्क लावलेला नसेल तर त्याला मास्क लावण्यास सांगावे.
– शिंकताना, खोकताना तोंडावर मास्क असला तरी हात ठेवावा; त्यानंतर हात सॅनिटाइझ करावा.
– औषधे घेताना टेबल किंवा काउंटरला टेकू नये.
घराबाहेर पडण्याआधी…
– नाका-तोंडाला मास्क, डोळ्यावर चष्मा किंवा गॉगल आणि डोक्यावर टोपी असावी.
– सार्वजनिक वाहनाचा प्रवास टाळावा; शक्य नसल्यास सुरक्षित अंतर ठेवून बसावे.
– स्वत:चे वाहन असल्यावर दुचाकीवर एकच व्यक्ती असावी.
– वाहनाचे हॅन्डल, बसण्याची जागा सॅनिटाईझ करून घ्यावी
– प्रवास करताना सार्वजनिक शौचालयाचा वापर टाळावा.
– पूर्ण शरीर झाकले जाईल, असे कपडे घालावेत.
– हातात ग्लोव्हज घालावेत आणि शक्यतो बूट वापरावा.
रुग्णालयात गेल्यावर प्रामुख्याने सुरक्षित अंतर ठेवणे, नाका-तोंडाला मास्क लावणे आणि हातात ग्लोव्हज असावे. आपली प्रतिकारशक्ती चांगली राहण्यासाठी पोषक आहार घ्यावा. व्हिटॅमीनचे प्रमाण वाढवावे. वृद्ध व्यक्ती आणि लहान मुलांनी शक्यतो घराबाहेर पडू नये.
– डॉ. संजीव वावरे, सहाय्यक आरोग्य प्रमुख, पुणे महापालिका