पुणे – महापालिकेकडून शहरातील सुक्या कचऱ्याची वाहतूक करण्यासाठी बीआरसी ट्रक वापरण्यात येतात. या ट्रकची क्षमता 7 ते 10 टन कचऱ्याची आहे. मात्र, आता महापालिकेच्या ताफ्यात तब्बल 20 ते 22 टन कचरा एकाच वेळी वाहतूक करू शकणारे आणि वॉकिंग फ्लोरची सुविधा असलेले तीन ट्रक दाखल झाले आहेत. या ट्रकचे लोकार्पण पालकमंत्री चंद्रकांत पाटील यांच्या हस्ते शनिवारी करण्यात आले.
आमदार भिमराव तापकीर, महापालिका आयुक्त विक्रम कुमार, अतिरिक्त आयुक्त डॉ. कुणाल खेमणार, कीथ कंपनीच्या अध्यक्षा लिंडसे फॉस्टर ड्रॅग्रो, संचालक वरूण गजरा, घनकचरा व्यवस्थापन विभागाच्या उपायुक्त आशा राऊत यावेळी उपस्थित होत्या. या ट्रकमध्ये कीथ कंपनीने विकसित केलेली यंत्रणा उपलब्ध करून दिली आहे. कंपनीच पुढील दहा वर्षे या यंत्रणेची देखभाल दुरुस्ती करणार आहे, असे कंपनी अध्यक्षा ड्रॅग्रो यांनी सांगितले. जुन्या हायवाच्या तीन ट्रकमध्ये नेता येणारा कचरा कीथच्या एकाच ट्रकमध्ये नेता येणार आहे.
- काय आहेत वैशिष्ट्ये…
- पूर्वीच्या 3 ट्रकचा कचरा एकाच ट्रकमध्ये वाहतूक
- कचरा लोडिंग-अनलोडिंगचा वेळ एक तासाने वाचणार
- वॉकिंग फ्लोरमुळे कचरा पडण्याचे प्रमाण अत्यल्प