अहमदाबाद – गुजरातमधील भाजपच्या स्टार प्रचारकांमध्ये बॉलीवूड अभिनेता विवेक ओबेरॉय याला स्थान मिळाले आहे. पंतप्रधान नरेंद्र मोदी यांच्यावर आधारित चित्रपटातील प्रमुख भूमिकेवरून तो सध्या चर्चेत आहे.
लोकसभा निवडणुकीसाठी भाजपकडून गुजरातमधील 40 स्टार प्रचारकांची यादी निवडणूक आयोगाला सादर करण्यात आली. त्या यादीत विवेकबरोबरच स्मृती इराणी, हेमा मालिनी आणि परेश रावल यांच्या नावांचा समावेश आहे. स्मृती या केंद्रीय मंत्री आहेत. तर हेमा मालिनी आणि रावल भाजपचे विद्यमान खासदार आहेत. स्टार प्रचारकांच्या यादीत मोदी आणि पक्षाध्यक्ष अमित शहा यांची नावे स्वाभाविकपणे आहेतच. त्यांच्या शिवाय त्या यादीत मध्यप्रदेशचे माजी मुख्यमंत्री शिवराजसिंह चौहान आणि राजस्थानच्या माजी मुख्यमंत्री वसुंधराराजे शिंदे यांचाही समावेश आहे. गुजरातमध्ये लोकसभेच्या एकूण 26 जागा आहेत. मागील निवडणुकीत भाजपने त्या सर्व जागा जिंकल्या होत्या. यावेळी तशीच कामगिरी करण्याचे मोठे आव्हान भाजपपुढे आहे. गुजरातमध्ये 23 एप्रिलला एकाच टप्प्यात मतदान होईल.
