Vinesh Chandel : दिल्ली न्यायालयाने गुरुवारी इंडियन पॉलिटिकल ॲक्शन कमिटी (आय-पॅक) चे संचालक विनेश चंडेल (Vinesh Chandel) यांना नियमित जामीन मंजूर केला. मनी लाँडरिंगच्या संशयित प्रकरणात अंमलबजावणी संचालनालयाने १३ एप्रिल रोजी त्यांना अटक केली होती. पटियाला हाऊस न्यायालयाचे अतिरिक्त सत्र न्यायाधीश अमित बन्सल यांनी हा आदेश जारी करताना असे निरीक्षण नोंदवले की, अंमलबजावणी संचालनालयाने चंडेल यांच्या जामिनाला कोणताही विरोध केला नाही. अर्जदाराच्या विद्वान वरिष्ठ वकिलांनी पीएमएलएच्या कलम ४५ चा संदर्भ देत म्हटले आहे की, प्रस्तुत प्रकरणात विशेष सरकारी वकिलांना जामिनाला विरोध करण्याची संधी देण्यात आली होती; परंतु त्यांनी तसे केले नाही. Vinesh Chandel त्यामुळे या जामिनासाठीच्या प्रकरणात दुहेरी अटी लागू होणार नाहीत, असे न्यायालयाने म्हटले आहे. ईडीने सांगितले की, आय-पॅक कन्सल्टिंग प्रायव्हेट लिमिटेडच्या संस्थापकांपैकी एक आणि ३३ टक्के भागधारक असलेले चंडेल यांची, पीएमएलए अंतर्गत मनी लाँडरिंग प्रकरणात चौकशी केली जात आहे. हे प्रकरण दिल्ली पोलिसांनी दाखल केलेल्या एफआयआरवरून उद्भवले आहे. चंडेल यांनी २३ एप्रिल रोजी जामिनासाठी दिल्ली उच्च न्यायालयात अर्ज दाखल केला होता. मनी लाँड्रिंग प्रकरणाच्या संदर्भात ईडी’ने चंडेल याला १३ एप्रिल रोजी अटक केली होती. काय आहे प्रकरण? यापूर्वी, ईडीने कोलकाता येथील ‘सॉल्ट लेक’ भागात असलेल्या आय-पॅकच्या कार्यालयावर छापा टाकला होता, ज्यामुळे पश्चिम बंगालच्या मुख्यमंत्री ममता बॅनर्जी यांच्याशी त्यांचा संघर्ष निर्माण झाला होता. ईडीच्या मते, या तपासात कंपनीशी संबंधित अनेक कथित आर्थिक अनियमितता उघडकीस आल्या आहेत. यामध्ये घोषित आणि अघोषित अशा दोन्ही प्रकारच्या निधीचा स्वीकार करणे, कोणत्याही ठोस व्यावसायिक कारणाशिवाय असुरक्षित कर्जे घेणे, बनावट पावत्यांचा वापर करणे आणि त्रयस्थ पक्षांमार्फत पैशांचे वळते करणे यांचा समावेश आहे. रोख रक्कम एका ठिकाणाहून दुसऱ्या ठिकाणी हलवण्यासाठी देशांतर्गत आणि आंतरराष्ट्रीय हवाला मार्गांचा वापर केल्याचा आरोपही ईडीने पुढे केला आहे.