सातारा- (पळसावडे) – गावच्या हद्दीत वनविभागाच्या जागेत काम करणार्या मजूरांना दुसर्या गावात कामासाठी नेल्याच्या रागातून पळसावडे (ता. सातारा) गावचा माजी सरपंच व वन समितीचा अध्यक्ष रामचंद्र जानकर व त्याची पत्नी प्रतिभा यांनी वनरक्षक सिंधू बाजीराव सानप व त्यांचे पती वनरक्षक सूर्याजी उत्तरेश्वर ठोंबरे यांना लाथाबुक्क्यांनी मारहाण केल्याची घटना घडली होती. त्यानंतर सातारा तालुका पोलीस व स्थानिक गुन्हे शाखेच्या पथकाने रामचंद्र जानकर याला शिरवळ येथून तर त्याची पत्नी प्रतिभा हिला शाहूनगर (सातारा) येथून अटक केल्याची माहिती अप्पर पोलीस अधीक्षक अजित बोर्हाडे यांनी दिली.
Two persons have manhandled our lady forest guard in the line of duty…gruesome attack at Satara …fir filed against the accused…#moefcc #conservation pic.twitter.com/HgACtmeUo4
— Clement Ben IFS (@ben_ifs) January 19, 2022
पळसावडे गावच्या हद्दीत असलेल्या वन विभागाच्या जागेत काम करत असलेले मजूर सानप यांनी प्राणी गणना करण्यासाठी दि.17 रोजी शेजारच्या गावात नेले होते. याचा राग मनात धरून प्रतिभा जानकर हिने सानप यांना मजूर का नेले असे विचारून शिवीगाळ दमदाटी केली. त्यानंतर सानप या सातारा येथे आल्यानंतर आज सकाळी त्यांचे पती ठोंबरे यांच्या मोबाइलवर फोन करून रामचंद्र जानकर यांनी तुझ्या बायकोला घेऊन पळसावडेला ये, असे म्हणत शिवीगाळ केली. त्यानंतर सानप यांनी घडला प्रकार वरिष्ठांच्या कानावर घातलून पुन्हा त्या कर्तव्य बजावण्यासाठी पळसावडे बीटा गेल्या होत्या. दरम्यान त्यांना सोडण्यासाठी त्यांचे पती ठोंबरे हे आले होते.
यावेळी प्रतिभा जानकर हिने ठोंबरे यांना चप्पलने मारहाण करण्यास सुरूवात केली. पतीला सोडवण्यासाठी गेलेल्या सानप यांना रामचंद्र जानकर याने लाथाबुक्क्यांनी मारहाण करून जिवे मारण्याची धमकी दिल्याचे सानप यांनी दिलेल्या तक्रारीत म्हटले होते.
घटनेचे व्हिडिओ सोशल मीडियातून प्रसारित झाल्यानंतर राज्य महिला अयोगाच्या अध्यक्षा रूपाली चाकणकर, पर्यावरणमंत्री आदित्य ठाकरे यांनी गंभीर दखल घेत, घटनेचा निषेध व्यक्त करून पोलिसांना तपासाच्या सुचना केल्या होत्या. पोलिसांनी जानकरला शिरवळ येथून तर त्याची पत्नी प्रतिभाला सातार्यातून अटक करण्यात आली आहे.