लंडन : खलिस्तानवादी स्वयंघोषित शीख धर्मोपदेशक अमृतपाल सिंग याला पंजाब पोलिसांनी दोन दिवसापूर्वी अटक केली होती. त्याला नकोदर येथून नाट्यमयरित्या ताब्यात घेण्यात आले होते मात्र देशात झालेल्या या अटकेचे पडसाद हे जगात उमटत असल्याचे पाहायला मिळत आहे. अमृतपाल सिंग यांच्या अटकेच्या कारवाईविरोधात ब्रिटनमधील भारतीय उच्चायुक्त कार्यालयाबाहेर खलिस्तानी समर्थकांकडून आंदोलन करण्यात आले. यावेळी खलिस्तानी समर्थकांनी भारतीय राष्ट्रध्वजाचा अपमान केला.
अमृतपाल सिंगच्या समर्थनात जोरदार घोषणाबाजी देखील उच्चायुक्ता बाहेर करण्यात आली. याचा व्हिडीओ सध्या सोशल मीडियावर व्हायरल होत आहे. या व्हिडीओमध्ये काही खलिस्तानी समर्थक ब्रिटनमधील भारतीय उच्चायुक्त कार्यालयाबाहेर आंदोलन करताना दिसून येत आहेत. तसेच अमृतपाल सिंगच्या समर्थनात जोरदार घोषणाबाजीदेखील त्यांच्याकडून करण्यात येत आहे. यावेळी काही समर्थकांनी उच्चायुक्त कार्यालयावरील भारतीय राष्ट्रध्वज खाली उतरवून तिरंग्याचा अपमान केला आहे.
#WATCH | United Kingdom: Khalistani elements attempt to pull down the Indian flag but the flag was rescued by Indian security personnel at the High Commission of India, London.
(Source: MATV, London)
(Note: Abusive language at the end) pic.twitter.com/QP30v6q2G0
— ANI (@ANI) March 19, 2023
दरम्यान, या घटनेनंतर भारत सरकारकडून तीव्र नाराजी व्यक्त केली आहे. परराष्ट्र मंत्रायलयाने ब्रिटनच्या भारतातील उच्चायुक्तांना बोलावून निषेध नोंदवला आहे. तसेच ही घटना घडली तेव्हा ब्रिटीश सुरक्षा अधिकारी या ठिकाणी उपस्थित का नव्हते. आंदोलनकर्त्यांना उच्चायुक्तालयाच्या परिसरात प्रवेश का देण्यात आला? यासंदर्भातील स्पष्टीकरणही भारत सरकारने मागितले आहे.
दरम्यान, भारतातील ब्रिटिश उच्चायुक्त अॅलेक्स एलिस यांनी या घटनेचा निषेध केला आहे. “भारतीय उच्चायुक्तालय परिसरात घडलेली घटना निषेधार्ह आहे. मी या घटनेचा तीव्र शब्दात निषेध करतो. हे पूर्णपणे चुकीचं आणि अमान्य आहे”, अशी प्रतिक्रिया त्यांनी ट्वीटद्वारे दिली.
