US Iran War: इराणमध्ये अंतर्गत कलह सुरु ! अध्यक्ष पेझेश्कियान-आयआरजीसी प्रमुख यांच्यातील मतभेद चव्हाट्यावर ; सत्तापालटाची चिन्हे?

US Iran War: इराण आणि अमेरिका यांच्यातील युद्धाने आता वेगळे वळण घेतले आहे. त्यातच आता इराणमध्ये अंतर्गत कलहाला सुरुवात झाली असल्याचे समोर येत आहे. कारण आता इराणचे राष्ट्राध्यक्ष पेझेश्कियन आणि आयआरजीसीचे प्रमुख अहमद वाहिदी यांच्यात युद्ध संपवण्याबाबत मतभेद झाल्याचे वृत्त समोर आले आहे.

पेझेश्कियन यांना मध्यममार्गी मानले जाते, तर आयआरजीसी प्रमुखांची विचारसरणी कट्टर असून ते अमेरिका आणि इस्रायलला कट्टर शत्रू मानतात. हे मतभेद सुरू असलेले युद्ध आणि त्याचे परिणाम कसे हाताळावेत याच्याशी संबंधित आहेत, विशेषतः त्याचा जनतेवर आणि देशाच्या अर्थव्यवस्थेवर परिणाम होत आहेत.

इराण इंटरनॅशनलच्या मते, राष्ट्राध्यक्ष पेझेश्कियन यांनी आयआरजीसीच्या रणनीतीवर प्रश्नचिन्ह उपस्थित केले आहे. त्यांच्या मते, तणावातील सततची वाढ आणि शेजारील देशांवरील हल्ल्यांमुळे देशाची आर्थिक परिस्थिती बिघडत आहे.

त्यांनी असा इशारा दिल्याचे वृत्त आहे की, जर युद्ध लवकर संपले नाही, तर पुढील तीन आठवडे ते एका महिन्याच्या आत इराणची अर्थव्यवस्था पूर्णपणे कोलमडून पडू शकते. ७ मार्च रोजी, पेझेश्कियन यांनी एका व्हिडिओ संदेशात शेजारील देशांवरील हल्ल्यांबद्दल माफी मागितली आणि लष्कराला असे हल्ले थांबवण्याचे निर्देश दिले, परंतु त्यांच्या वक्तव्यानंतरही हल्ले सुरूच राहिले.

US Iran War:

अध्यक्ष पेझेश्कियन यांची मागणी US Iran War:

परिस्थिती अधिक चांगल्या प्रकारे हाताळण्यासाठी सरकारला संपूर्ण प्रशासकीय निर्णय घेण्याचे अधिकार द्यावेत, अशी मागणीही अध्यक्षांनी केली आहे, परंतु अहमद वाहिदी यांनी ही मागणी स्वीकारण्यास स्पष्टपणे नकार दिला. यावर प्रतिक्रिया देताना, आयआरजीसीच्या प्रमुखांनी सांगितले की, सध्याच्या परिस्थितीसाठी सरकारदेखील जबाबदार आहे, कारण युद्ध सुरू होण्यापूर्वी आवश्यक सुधारणा लागू केल्या गेल्या नाहीत.

दरम्यान, इस्रायली माध्यमांनी वृत्त दिले आहे की इराणच्या राजवटीत फूट पडू लागली आहे. काही वृत्तांनुसार, अशी परिस्थिती निर्माण होत आहे ज्यामुळे भविष्यात मोठे बदल होऊ शकतात. युद्धामुळे देशाची आर्थिक परिस्थिती सतत खालावत आहे.

अनेक शहरांमध्ये एटीएम रिकामे किंवा बंद आहेत. ऑनलाइन बँकिंग सेवा देखील वारंवार बंद पडत आहेत, ज्यामुळे लोकांना पैसे काढणे कठीण होत आहे. सरकारी कर्मचाऱ्यांनी असेही सांगितले आहे की, गेल्या तीन महिन्यांपासून अनेकांना त्यांचे पगार आणि भत्ते वेळेवर मिळालेले नाहीत.

युद्धामुळे इराणमध्ये महागाई वाढली US Iran War:

इराणमधील युद्ध सुरू होण्यापूर्वीच, फेब्रुवारीमध्ये जीवनावश्यक वस्तूंची महागाई लक्षणीयरीत्या वाढली होती, जी १०५% ते ११५% पर्यंत पोहोचली होती. आता, युद्धामुळे परिस्थिती आणखीच बिघडली आहे. इराण एका बाह्य युद्धाचा सामना करत आहे, तर दुसरीकडे सरकार आणि लष्कर यांच्यातील अंतर्गत मतभेद वाढत असून, त्यामुळे परिस्थिती अधिकच गुंतागुंतीची होत आहे.