सांगली- राज्यात पुन्हा एकदा अवकाळी पावसाचे संकट घोंगावत असून, सांगली जिल्ह्याला त्याचा जोरदार तडाखा बसला आहे. मिरज शहर आणि आसपासच्या परिसरात वादळी वाऱ्यासह आलेल्या अवकाळी पावसाने जनजीवन विस्कळीत केले. झाडे उन्मळून पडणे, वीजपुरवठा खंडित होणे आणि काही ठिकाणी घरांवरील पत्रे उडून जाण्याच्या घटनांनी नागरिकांची तारांबळ उडाली.
मिरजवर पावसाची बरसात –
मिरज शहरासह ग्रामीण भागात विजांच्या कडकडाटासह जोरदार पाऊस कोसळला. सोबतच वादळी वाऱ्याने रस्त्याकडेची छोटी-मोठी झाडे कोलमडून पडली. या हवामानाच्या तडाख्याने अनेक ठिकाणी वीजपुरवठा ठप्प झाला, तर काही घरांचे पत्रे उडून गेले. वातावरणात अचानक बदल झाल्याने नागरिक हैराण झाले.
उष्णतेतून दिलासा, पण नुकसानही –
उन्हाळ्याच्या तीव्र उष्णतेने हैराण झालेल्या नागरिकांना या पावसाने काहीसा दिलासा दिला. वातावरणात थंडावा निर्माण झाला असला तरी, अवकाळी पावसामुळे जनजीवनावर परिणाम झाला. विशेषतः शेतकऱ्यांचे मोठे नुकसान झाले आहे. उन्हाळी पिकांना या पावसाचा फटका बसला असून, शेतीचे संभाव्य नुकसान चिंतेचा विषय बनला आहे.
पुढील काही दिवस अवकाळीची शक्यता –
हवामान खात्याने पुढील काही दिवस राज्यात अवकाळी पाऊस पडण्याचा अंदाज वर्तवला आहे. सांगलीत झालेल्या या जोरदार पावसाने शेतकरी आणि नागरिकांमध्ये संमिश्र प्रतिक्रिया उमटल्या आहेत. एकीकडे उष्णतेपासून सुटका, तर दुसरीकडे नुकसानाची भीती, अशी परिस्थिती निर्माण झाली आहे.
