पुणे – पहिल्या अल्टिमेट खो खो स्पर्धेत (Ultimate Kho Kho 2022)अखेरच्या साखळी फेरीच्या सामन्यात तेलगु योद्धाज व गुजरात जायंट्स या संघांनी विजयी समारोप केला. तेलगु योद्धाज संघाने ओडिशा जगरनाट्सचा 65-36 असा तर, गुजरात जायंट्स संघाने राजस्थान वॉरियर्स संघाचा 47-42 असा पराभव केला.
श्री शिवछत्रपती क्रीडा संकुल म्हाळुंगे बालेवाडी येथे सुरू असलेल्या या स्पर्धेत आज मैदानात उतरलेल्या खो खो खेळाडूंना युवा विश्वचषक जिंकणाऱ्या भारतीय क्रिकेट संघाचा कर्णधार क्रिकेटपटू पृथ्वी शॉ यांच्याकडून खास प्रोत्साहन मिळाले. पृथ्वी शॉ याने सामन्याच्या ठिकाणी उपस्थित राहून अल्टिमेट खो खो लीगमधील रोमांचकारी चुरस आणि चित्तथरारक क्षणांचा आनंद लुटला.
ध्रुव याने 12 गुणांची कमाई करताना तेलगु योद्धाजच्या विजयात महत्त्वाचा वाटा उचलला. तर, केसी धनुष याने 8 गुण मिळवून त्याला उत्कृष्ट साथ दिली. गुजरात जायंट्स (23गुण), ओडिशा जगरनट्स (21गुण), तेलगु योद्धाज (19गुण), चेन्नई क्विक गन्स (15गुण) हे चार संघ प्ले ऑफसाठी पात्र ठरले आहेत. क्वॉलिफायर आणि एलेमिनीटर शुक्रवारी खेळले जातील, तर क्वॉलिफायर 2 लढत शनिवारी होणार आहे.अंतिम सामना रविवारी 4 सप्टेंबर रोजी होणार आहे.
पहिल्या सामन्यात वझीर अभिनंदन पाटील ने 8 गुण मिळवून गुजरातच्या विजयात मोलाचा वाटा उचलला. तर, राजस्थानकडून कर्णधार माझहर जमादारने 7 गुण मिळवून एकाकी झुंज दिली. राजस्थान वॉरियर्सने गुजरातला चुरशीची झुंज दिली; परंतु प्ले ऑफमधील आधीच स्थान निश्चित केलेल्या गुजरातने सामन्यावरील वर्चस्व कायम राखले. सागर पोतदारने 3 मिनिटे 21 सेकंद खेळ करताना 4 बोनस गुणांची कमाई केल्याने तिसऱ्या सत्राअखेर त्यांनी राजस्थानला 18 गुणांवर रोखले होते. त्यामुळे अखेरच्या सत्रात केवळ 13 गुणांचा बचाव करण्याचे आव्हान राजस्थान समोर राहिले. नीलेश पाटीलने गुजरातला 2 मिनिटे बाकी असतानाच विजयी आघाडी मिळवून देताना याल्ला सतीश याला पोल डाईव्हवर बाद केले. त्यानंतर गुजरातने लगेचच विजय निश्चित केला.
त्याआधी राजस्थानने पहिल्या सत्राअखेर गुजरातच्या आठ खेळाडूंना बाद करून 20-02 अशी आघाडी घेतली होती. अक्षय गणपुळेने दुसरी सत्रात 2मिनिटे 45 सेकंद खेळ करताना 2 बोनस गुणांसह राजस्थानकडून झुंज दिली. तरीही गुजरातने मध्यांतरला 23-22 अशी आघाडी राखली होती. हीच आघाडी कायम राखत त्यांनी साखळी स्पर्धेत विजयाचा समारोप केला.