किव्ह – युक्रेनने सरकारी अधिकारी, लष्करी अधिकारी आणि संरक्षण क्षेत्रातील अन्य महत्वाच्या अधिकाऱ्यांनी टेलिग्राम हे मेसेजिंग ऍप वापरण्यास बंदी घातली आहे. सर्वच महत्वाच्या क्षेत्रात कार्यरत असलेल्या कर्मचाऱ्यांनीही टेलिग्राम हे ऍप सरकारी कामकाजासाठी वापरायच्या मोबाइलमध्ये वापरण्यास बंदी घातली गेली आहे.
रशियाविरोधात सुरू असलेल्या युद्धाच्या पार्श्वभुमीवर राष्ट्रीय सुरक्षेचा विचार करून हा निर्णय घेण्यात आला आहे, असे युक्रेनच्या नॅशनल सायबर सिक्युरिटी कोऑर्डिनेशन सेंटरने सांगितले. युक्रेनच्या सुरक्षा आणि संरक्षण परिषदेने फेसबुकवर दिलेल्या निवेदनात शुक्रवारी ही बंदी जाहीर केली.
सायबर हल्ला, फिशिंग, मालवेअर पसरवणे, वापरकर्त्याची ठिकाणे स्थापित करणे आणि क्षेपणास्त्र स्ट्राइक कॅलिब्रेट करण्यासाठी टेलिग्राम सक्रियपणे रशियाद्वारे वापरले जाते, असे गुरुवारी झालेल्या बैठकीदरम्यान युक्रेनची सुरक्षा सेवा आणि युक्रेनच्या सशस्त्र दलाच्या जनरल स्टाफने सांगितले.
सरकारी कामकाजाव्यतिरिक्त अन्य कालावधीत आणि सर्वसामान्य नागरिकांकडून हे ऍप वापरले जाण्यास कोणताही अटकाव असणार नाही, असे स्पष्ट करण्यात आले आहे.
युक्रेनमध्ये केवळ मजकूर पाठवण्यासाठीच नव्हे तर रशियन हवाई हल्ल्यांच्या बातम्या वाचण्यासाठी देखील या ऍपचा मोठ्या प्रमाणावर वापर केला जातो. अध्यक्ष झेलेन्स्की हे देखील जनतेशी संवाद साधण्यासाठी या ऍपचा सर्रास वापर करत असतात.
