UK: ब्रिटिश सरकारने गुरुवारी जाहीर केले की ते लेबनॉनमधून आपल्या नागरिकांना बाहेर काढण्यासाठी अधिक चार्टर्ड उड्डाणे सुरू केली आहेत. लेबनॉन आणि इस्रायलमध्ये सुरू असलेल्या संघर्षाच्या पार्श्वभूमीवर हा निर्णय घेण्यात आला आहे. लेबनॉन आणि इस्रायलचे एकमेकांवर जोरदार हल्ले सुरु आहेत.
फॉरेन, कॉमनवेल्थ अँड डेव्हलपमेंट ऑफिस (FCDO) ने सांगितले की, जोपर्यंत सुरक्षा परिस्थिती अनुकूल आहे तोपर्यंत ही अतिरिक्त उड्डाणे सुरू राहतील. यासोबतच FCD ने असेही म्हटले आहे की ते ब्रिटीश नागरिकांसाठी व्यावसायिक उड्डाणांची क्षमता वाढवण्यासाठी भागीदारांसोबत काम करत आहे.
ब्रिटनचे परराष्ट्र मंत्री डेव्हिड लॅमी म्हणाले, अलीकडील घटनांवरून लेबनॉनमधील परिस्थिती अस्थिर असल्याचे स्पष्ट झाले आहे. लेबनॉनमधील ब्रिटीश नागरिकांची सुरक्षा आमच्यासाठी अत्यंत महत्त्वाची आहे. म्हणूनच लेबनॉन सोडू इच्छिणाऱ्यांसाठी आम्ही अतिरिक्त चार्टर्ड फ्लाइट्सची घोषणा करत आहोत.
त्यांनी यूकेच्या नागरिकांना एफसीडीओकडे नोंदणी करून लेबनॉन ताबडतोब सोडण्याचे आवाहन केले. ज्या यूकेच्या नागरिकांनी FCDO मध्ये नोंदणी केली आहे त्यांना सीटची विनंती कशी करावी याबद्दल माहिती पाठवली जाईल. ज्यांनी अद्याप नोंदणी केलेली नाही त्यांनी त्वरित नोंदणी करावी. सर्व यूके नागरिक, त्यांचे जोडीदार किंवा भागीदार आणि 18 वर्षाखालील मुले वैध प्रवास दस्तऐवजासह पात्र आहेत, असे सांगण्यात आले आहे.
FCDO ने सांगितले की, त्यांचे अधिकारी ब्रिटीश नागरिकांना आधार देण्यासाठी लंडन, बेरूत आणि आसपासच्या भागात चोवीस तास कार्यरत आहेत. UK दूतावासाच्या अधिकाऱ्यांनी पुरविलेल्या पाठिंब्याला बळ देण्यासाठी FCDO रॅपिड डिप्लॉयमेंट टीम देखील लेबनॉनमध्ये आली आहे.
ब्रिटनचे संरक्षण मंत्री जॉन हेली यांनी बुधवारी सायप्रसला भेट दिली, जिथे त्यांनी सुमारे 700 ब्रिटिश लष्करी कर्मचाऱ्यांची भेट घेतली. लेबनॉनमधील नागरिकांना मदत करण्यासाठी आपत्कालीन योजनेअंतर्गत हे लष्करी जवान तैनात करण्यात आले आहेत. त्यांनी त्यांचे सायप्रियट समकक्ष वासिलिस पालामास यांच्याशी पश्चिम आशियातील तणाव कमी करण्याबाबत चर्चा केली. हेली यांनी इस्रायली समकक्ष योव गॅलंट यांच्याशी फोनवर बोलून इराणच्या क्षेपणास्त्र हल्ल्यांचा निषेध केला आणि लेबनॉनमध्ये शांतता आणि युद्धविराम करण्याचे आवाहन केले.
