Bribe: जमिनीच्या नोंदीत नाव समाविष्ट करून देण्यासाठी २० हजार रुपयांची लाच मागून स्वीकारल्याप्रकरणी महसूल विभागातील दोन महिला कर्मचाऱ्यांना लाचलुचपत प्रतिबंधक विभागाने (एसीबी) अटक केली. ही कारवाई राजापूर तालुक्यातील तलवडे येथील मंडळ कार्यालयात करण्यात आली. संजना नंदकुमार माने (वय ४१, कोतवाल तलाठी) आणि पूनम जयसिंग गावीत (वय ३७, मंडळ अधिकारी) अशी अटक करण्यात आलेल्या कर्मचाऱ्यांची नावे आहेत. तक्रारदार महिलेच्या पालकांच्या नावे जावळेथर (ता. राजापूर) येथे वडिलोपार्जित जमीन आहे. या जमिनीच्या नोंदीत पतीचे नाव समाविष्ट करण्यासाठी तिने महसूल कार्यालयात अर्ज केला होता. हा प्रस्ताव मंजूर करून देण्यासाठी मंडळ अधिकारी गावीत यांनी माने यांच्या माध्यमातून सुरुवातीला २५ हजार रुपयांची मागणी केली. तडजोडीनंतर ही रक्कम २० हजारांवर निश्चित करण्यात आली. लाच देण्याची इच्छा नसल्याने संबंधित महिलेने एसीबीकडे तक्रार दाखल केली. त्यानंतर एसीबीच्या पथकाने सापळा रचून गुरुवारी मंडळ कार्यालयात माने यांना लाचेची रक्कम स्वीकारताना रंगेहाथ पकडले. ही रक्कम त्यांनी मंडळ अधिकारी गावीत यांच्या वतीने स्वीकारल्याचे तपासात निष्पन्न झाले.