भोपाळ -“क्राईम पेट्रोल’ फेम टीव्ही अभिनेत्री प्रेक्षा मेहताने गळफास घेऊन आत्महत्या केली आहे. वयाच्या अवघ्या 25 व्या वर्षी प्रेक्षाने हे टोकाचे पाऊल उचलले. मध्य प्रदेशातील इंदौरमध्ये आपल्या राहत्या घरी पंख्याला गळफास बांधून तिने आयुष्य संपवले.
प्रेक्षाने गळफास घेण्यापूर्वी सुसाईड नोट लिहिली आहे. मात्र, त्यामध्ये तिने आत्महत्येच्या कारणाचा उल्लेख केलेला नाही. लॉकडाऊनच्या काळात हातात काम नसल्याने प्रेक्षा निराश होती, त्यातून तिने टोकाचे पाऊल उचलल्याचा प्राथमिक अंदाज आहे. आत्महत्येपूर्वी प्रेक्षाने इन्स्टाग्रामवर स्टोरी अपलोड केली होती. स्वप्न विरुन जाणं, सर्वात वाईट असतं (सबसे बुरा होता है सपनों का मर जाना), अशा आशयाचं स्टेटस तिने ठेवले होते.
प्रेक्षाने “क्राईम पेट्रोल’ या मालिकेव्यतिरिक्त “मेरी दुर्गा’ आणि “लाल इश्क’ आदी टीव्ही मालिकांमध्येही काम केले आहे. मंटो यांनी लिहिलेल्या “खोल दो’ या नाटकात तिने मध्यवर्ती भूमिका साकारली होती. या नाटकाला मिळालेल्या प्रतिसादानंतर खूबसूरत बहू, बूंदें, प्रतिबिंबित, पार्टनर्स, थ्रिल, अधुरी औरत अशा अनेक नाटकांमध्ये तिला भूमिका मिळाल्या.
दरम्यान, लॉकडाऊनच्या काळात कलाकाराने केलेल्या आत्महत्येची दुसरी घटना घडली आहे. याआधी अभिनेता मनमीत ग्रेवाल याने आपल्या नवी मुंबईतील निवासस्थानी फॅनला लटकून आत्महत्या केली होती.
32 वर्षीय मनमीत लॉकडाऊनमुळे आर्थिक अडचणीत सापडला होता. अनेक दिवसांपासून तो डिप्रेशनमध्ये होता.