Top 10 News : “तटकरे अन् पटेल क्षमता असणारे नेते”- शरद पवार, लाडक्या बहि‍णींच्या खात्यावर पैसे जमा आणि देशभरात इंधन दरवाढीचा भडका , वाचा टॉप १० बातम्या

तटकरे अन् पटेल क्षमता असणारे नेते- शरद पवार Top 10 News : राष्ट्रवादीच्या विलिकरनाबाबत शरद पवार यांनी मोठं विधान केलंय. विलिनीकरणाबाबत दिवंगत उपमुख्यमंत्री अजित पवार आणि शरद पवार गटाचे नेते जयंत पाटील यांच्यात चर्चा झाली होती. पण त्याबाबत पुढे कोणताच निर्णय झाला नाही, असं शरद पवार म्हणाले. तसेच बारामतीमध्ये 2029 मध्ये पवार विरुद्ध पवार अशा संघर्षावर बोलताना प्रत्येकाने काळजी घ्यावी, असा सल्लाही शरद पवारांनी दिला. राष्ट्रवादी काँग्रेस अजित पवार गटाच्या राष्ट्रीय कार्यकारिणीच्या यादीतून पक्षाचे प्रदेशाध्यक्ष सुनील तटकरे आणि ज्येष्ठ नेते प्रफुल पटेल यांची नाव वगळल्याने मोठी चर्चा होत असताना पवारांनी मात्र या दोन्ही नेत्यांचे कौतुकही केलंय. सुनील तटकरे आणि प्रफुल पटेल हे दोन्ही क्षमता असणारे नेते आहेत, त्यांच्या क्षमतेचा कसा वापर करावा, हे त्यांच्या आत्ताच्या नेतृत्वाकडे अधिकार आहे,असं म्हणत सुनेत्रा पवार यांना सूचक इशारा दिलाय.

लाडक्या बहिणींच्या खात्यावर पैसे जमा ईकेवायसीच्या पडताळणीनंतर राज्यातील लाडक्या बहिणींच्या खात्यावर पैसे जमा होण्यास सुरूवात झाली आहे. गुरूवार संध्याकाळपासून अनेक लाडक्या बहिणींच्या मोबाईलवर लाडकी बहीण योजनेचा हप्ता जमा झाल्याचा मेसेज आलाय. मार्च, एप्रिल आणि मे या ३ महिन्यांचा एकत्र हप्ता येईल, असा अनेकांना अंदाज होता. पण सरकारकडून फक्त एकाच महिन्याचा हप्ता जमा करण्यात आला आहे. फेब्रुवारी २०२६ मध्ये लाडक्या बहिणींच्या खात्यावर १५०० रूपये जमा झाले होते. त्यानंतर 3 महिने उलटल्यानंतरही फक्त एकच हप्ता जमा झाल्याने लाडक्या बहिणींमध्ये काहीशी नाराजी आहे. एप्रिलचा हप्ता कधी येणार? असा सवाल विचारला जातोय.

HSRP नंबर प्लेट बसवण्याच्या तारखेत मुदतवाढ वाहनधारकांसाठी मोठी बातमी समोर आली आहे. १ एप्रिल २०१९ पूर्वी नोंदणी झालेल्या सर्व जुन्या वाहनांसाठी HSRP प्लेट बसवण्याच्या मुदतीत राज्य शासनाने वाढ केली आहे. परिवहन मंत्री प्रताप सरनाईक यांनी याबाबत अधिकृत माहिती देताना सांगितले की, आता वाहनधारकांना ३० जून २०२६ पर्यंत ही प्रक्रिया पूर्ण करण्याची संधी मिळणार असून लवकरात लवकर वाहनांची HSRP प्लेट बसवणे हिताचे ठरणार आहे.सरकारकडून यापूर्वी HSRP नंबर प्लेट बसवण्यासाठी ३१ डिसेंबर २०२५ ही अंतिम मुदत निश्चित करण्यात आली होती. मात्र, अनेक वाहनधारकांना अडचणींचा सामना करावा लागत असल्याचे स्पष्ट झाले. विशेषतः अपॉइंटमेंट मिळण्यात होणारा विलंब, तांत्रिक अडचणी आणि वाढती मागणी यामुळे प्रशासनाने वाहनधारकांना दिलासा देत मुदत ६ महिन्यांनी वाढवण्याचा निर्णय घेतला.

मानसोपचार तज्ज्ञ डॉ. आनंद नाडकर्णी यांचे निधन

मानवी मनाची गुंतागुंत, सूक्ष्म बारकावे आणि मानसिक आजार याबाबत सामान्यांना समजेल अशा सहजसोप्या शैलीत लिखाण करणारे आणि याच गोष्टीसाठी आपले संपूर्ण आयुष्य वेचणारे ख्यातनाम मानसोपचार तज्ज्ञ डॉ. आनंद नाडकर्णी यांचे शुक्रवारी मुंबईत निधन झाले. ते 68 वर्षांचे होते. आनंद नाडकर्णी यांना काही महिन्यांपूर्वी कर्करोगाचे निदान झाले होते. त्यासाठी त्यांच्यावर उपचार सुरु होते. मात्र, शुक्रवारी सकाळी मुंबईतील निवासस्थानी त्यांची प्राणज्योत मालवली.आनंद नाडकर्णी यांनी मानसिक आजार आणि मानसोपचार विपुल लेखन केले आहे. डॉ.नाडकर्णी यांनी मानसशास्त्राव्यतिरिक्त अन्य विषयांवरही पुस्तके लिहिली आहेत. त्यांच्या ‘गद्धेपंचविशी’ आणि ‘विषादयोग’ या पुस्तकांना महाराष्ट्र सरकारचा पुरस्कारदेखील मिळालाय

सुनेत्रा पवार यांना मोठा धक्का ; ‘या’ नेत्याने सोडली साथ Top 10 News : राष्ट्रवादी काँग्रेसच्या नेत्या सुनेत्रा पवार यांना मोठा धक्का बसला. राष्ट्रवादी काँग्रेसचे नेते आनंद परांजपे यांनी पक्षाची साथ सोडत उपमुख्यमंत्री एकनाथ शिंदे यांच्या शिवसेनेत प्रवेश केला. १४ वर्षांनंतर आनंद परांजपे यांनी घरवापसी केली. मंत्री दादा भुसे, खासदार श्रीकांत शिंदे आणि मंत्री उदय सामंत यांच्या उपस्थितीत त्यांनी धनुष्यबाण हाती घेतले. आज दुपारीच आनंद परांजपे यांनी राष्ट्रवादी काँग्रेस पक्षाच्या सर्व पदांचा राजीनाम दिला होता. त्यानंतर त्यांनी शिंदेसेनेत पक्षप्रवेश केला. आमदारकी न मिळाल्यामुळे ते नाराज होते त्यामुळेच त्यांनी पक्षाची साथ सोडत शिंदेगटात प्रवेश केला असल्याचे सांगितले जात आहे.

रामधन महाराज यांचं हृदयविकाराच्या झटक्याने निधन बंजारा समाजाचे थोर प्रबोधनकार रामधन महाराज राठोड यांच्या निधनाने संपूर्ण समाजावर दुःखाचा डोंगर कोसळलाय. रामधन महाराज हे सुरुमगाव तांडा याठिकाणी आयोजित एका कार्यक्रमात बंजारा भजन सादर करत होते. मोठ्या संख्येनं या कार्यक्रमाला बंजारा बांधव हजर होते. समाजप्रबोधनाचे विचार मांडत असताना आणि भजनात तल्लीन असताना त्यांना अचानक चक्कर आली. त्यानंतर ते जागेवरच कोसळले.यावेळी त्यांना हृदयविकाराचा तीव्र धक्का आल्याचे सांगण्यात येतंय. दरम्यान, त्यांना तातडीने उपचारासाठी हलवण्यात आले, मात्र दुर्दैवाने त्यांची प्राणज्योत मालवली. अनेक वर्षांपासून ते बंजारा समाजात समाजाचं भजनातून प्रबोधन करत होते. त्यांची भजनाच्या कार्यक्रमाला नेहमी गर्दी होत असायची.

देशभरात इंधन दरवाढीचा भडका! पेट्रोल-डिझेलच्या दरात ३ रुपयांची वाढ

पंतप्रधान नरेंद्र मोदी यांच्या काटकसरीच्या आवाहनानंतर देशभरात पेट्रोल आणि डिझेलचे दर वाढलेत. पेट्रोल 3 रुपये प्रति लीटर आणि डिझेल 3.11 रुपये प्रति लीटर इतकं महागलंय. गेल्या काही दिवसांपासून, आंतरराष्ट्रीय बाजारात कच्च्या तेलाच्या वाढत्या किमतींचा परिणाम लवकरच देशांतर्गत ग्राहकांवर होईल, अशी चर्चा सुरू होती. अखेर, तेल कंपन्यांनी आजपासून इंधनाच्या किमतींमध्ये सुधारणा केली. आज सकाळी 6 वाजल्यापासून देशभरात पेट्रोल आणि डिझेलच्या दरात वाढ करण्यात आलीय. या दरवाढींमुळे सामान्यांच्या खिशाला पुन्हा एकदा कात्री लागणार आहे तर दुसरीकडे डिझेल महागल्याने आता मालवाहतूक आणि पर्यायाने जीवनावश्यक वस्तूंच्या किमती वाढण्याची दाट शक्यता निर्माण झालीय.

तैवानवरून चीनचा अमेरिकेला इशारा अमेरिकेचे अध्यक्ष डोनाल्ड ट्रम्प आणि चीनचे अध्यक्ष क्षी जिनपिंग यांच्यात गुरुवारी इराण युद्ध, व्यापार आणि ऊर्जा सुरक्षेवर दीर्घ चर्चा झाली. या वेळी तैवान मुद्द्याची चुकीच्या पद्धतीने हाताळणी केल्यास दोन्ही देशांत संघर्ष उद्भवू शकतो, असा इशारा जिनपिंग यांनी ट्रम्प यांना दिला. ऊर्जेची जागतिक गरज लक्षात घेता होर्मुझची सामुद्रधुनी खुली होणे आवश्यक असल्याचे दोन्ही नेत्यांनी मान्य केले. ट्रम्प आणि जिनपिंग यांच्यामध्ये चर्चेची पहिली फेरी बीजिंगमध्ये पार पडली. दोन्ही नेत्यांमध्ये दोन तास चर्चा झाली. यावेळी तैवानचा मुद्दा अमेरिकेने काळजीपूर्वक हाताळावा, असं आवाहन जिनपिंग यांनी ट्रम्प यांना केलंय.

६ विकेट राखत मुंबईचा विजय ; पंजाबचा सलग पाचवा पराभव पंजाब किंग्स आणि मुंबई इंडियन्स यांच्यात आयपीएल २०२६ चा ५८ वा सामना खेळला गेला. या सामन्यात मुंबई शानदार विजय मिळवला. तर पंजाब किंग्सला सलग पाचव्या पराभवावा सामोरे जावे लागले. प्रथम फलंदाजी करताना पंजाबच्या संघाने धावफलकावर २०० धावा केल्या होत्या.पंजाबने दिलेल्या आव्हानाचा पाठलाग करताना मुंबईची सुरुवात चांगली राहिली. सलामीवीर रोहित शर्मा आणि रायन रिकल्टन यांनी पहिल्या विकेटसाठी अर्धशतकी भागीदारी केली. रोहितने २६ चेंडूंमध्ये २५ धावा आणि रायनने २३ चेंडूंमध्ये ४८ धावा केल्या. त्यानंतर नमंधिर ६ चेंडूंमध्ये ९ धावा करून बाद झाला. त्यानंतर तिलक वर्माने धडाकेबाज खेळी केली. त्याने ३३ चेंडूंमध्ये नाबाद ७५ धावा करून पंजाबकडून विजय खेचून आणला.

‘झी मराठी’वर निवेदिता सराफांचं कमबॅक Top 10 News : छोट्या पडद्यावर येत्या काही दिवसांत अनेक नवनवीन मालिका प्रेक्षकांच्या भेटीला येणार आहेत. ‘झी मराठी’ने काही दिवसांपूर्वीच ‘कृष्णाईच्या लेकी’ या नव्या मालिकेची घोषणा केली होती. यामध्ये मुख्य भूमिका कोण साकारणार याबद्दल प्रेक्षकांच्या मनात प्रचंड उत्सुकता निर्माण झाली होती. अखेर ‘कृष्णाईच्या लेकी’चा पहिला जबरदस्त प्रोमो नुकताच प्रेक्षकांच्या भेटीला आला आहे. लोकप्रिय ज्येष्ठ अभिनेत्री निवेदिता सराफ या मालिकेच्या माध्यमातून झी मराठीवर कमबॅक करण्यासाठी सज्ज झाल्या आहेत. निवेदिता सराफ यांचा चाहतावर्ग मोठ्या प्रमाणात आहे.‘कृष्णाईच्या लेकी’ या मालिकेच्या प्रोमोमध्ये नायिका घरातील सगळी जबाबदारी खंबीरपणे सांभाळताना दिसतेय. या मालिकेची तारीख अन् वेळ अद्याप जाहीर करण्यात आलेली नाही. लवकरच ही मालिका प्रेक्षकांच्या भेटीला येईल. मात्र, निवेदिता यांच्यासह मालिकेत कोण-कोण झळकणार हे पाहणं महत्त्वाचं ठरणार आहे.