Top 10 news: राज्यसभेसाठी प्रीतम मुंडे यांचे नाव चर्चेत, पंतप्रधान मोदींचा नवा इतिहास, जाणून घ्या अशा टॉप १० बातम्या

राज्यसभेसाठी प्रीतम मुंडे यांचे नाव चर्चेत Top 10 news: राज्यसभेच्या ३७ जागा रिक्त होत होणार असून यातील ७ जागा महाराष्ट्रातील आहेत. राज्यसभेच्या महाराष्ट्रातील सात जागांच्या अनुषंगाने आता घडामोडींना वेग आलाय. या पार्श्वभूमीवर राज्यसभा निवडणुकीसाठी उमेदवारांच्या नावावर चर्चा करण्यासाठी मंगळवारी मुंबईत भाजपाच्या कोअर कमिटीची बैठक पार पडली, त्याचदरम्यान मोठी घडामोड घडताना दिसत आहे. राज्यसभेच्या ७ जागांसाठी येत्या १६ मार्चला निवडणूक पार पडणार आहे. राज्यातील सर्वाधिक ४ जागा भाजपाच्या वाट्याला येणार आहेत. यात शिंदेसेना आणि अजित पवारांच्या राष्ट्रवादीला एक-एक जागा मिळणार आहे. दुसरीकडे महाविकास आघाडीत एका जागेवरून चढाओढ दिसून येते. उद्धवसेना, काँग्रेस आणि शरद पवारांच्या राष्ट्रवादीत एका जागेवरून खलबते सुरू आहेत. यातच राज्यसभेसाठी प्रीतम मुंडे यांचे नाव चर्चेत आहे, अशी माहिती मंत्री पंकजा मुंडे यांनी दिलीय.

बारामती पोलीस स्टेशनमधील ब्लॅक बॉक्सचा फोटो व्हायरल

राज्याचे उपमुख्यमंत्री अजित पवार यांचे 28 जानेवारी रोजी विमान अपघातात निधन झालं. त्यानंतर त्यांच्या अपघातावर शंका उपस्थित केली जाऊ लागली. त्यांचे पुतणे आणि आमदार रोहित पवारांनी यावर व्हीएसआर कंपनीवर आरोप केले. त्याचसोबत राष्ट्रवादीचे आमदार अमोल मिटकरी यांनीही अजित पवारांच्या अपघातामागे घातपात असल्याचा संशय व्यक्त केला. दरम्यान, अजित पवारांच्या अपघाती विमानाचा ब्लॅक बॉक्स तपास यंत्रणांच्या हाती लागला. परंतु हा ब्लॅक बॉक्स जळालेल्या अवस्थेत असल्याचं तपास यंत्रणांनी सांगितलं. त्यामुळे त्यावर अनेक शंका उपस्थित केल्या गेल्या. त्यातच आता अजित पवार यांच्या विमान अपघातानंतर सापडलेला ब्लॅक बॉक्स बारामती तालुका पोलीस स्टेशनमध्ये ठेवण्यात आला होता. विशेष म्हणजे, Aircraft Accident Investigation Bureau म्हणजेच AAIB चे अधिकारी के. रामचंद्रन यांनी 29 जानेवारी 2026 रोजी दुपारी 2 वाजता हा ब्लॅक बॉक्स पोलीस ठाण्यात ठेवला होता. फक्त ब्लॅक बॉक्सच नाहीतर विमानाचे इतरही पार्ट पोलीस ठाण्यात ठेवले होते. आता हा ब्लॅक बॉक्स सुरक्षित होता का हे मात्र समजू शकले नसले तरी यामुळे विविध चर्चांना उधाण आले आहे.

मला लोकसभा लढण्याची इच्छा- आठवले

मी राज्यसभेवर जाणार हे मला आधीच माहीत आहे, मात्र लोकसभा निवडणूक लढवण्याची माझी इच्छा आहे, असं स्पष्ट वक्तव्य केंद्रीय राज्यमंत्री रामदास आठवले यांनी व्यक्त केली.भाजपकडून राज्यसभा उमेदवारी निश्चित झाल्यानंतर आठवले यांनी विजयाचा आत्मविश्वास व्यक्त केला. तसेच महाविकास आघाडीत काही बिघाड झाला तर सातवी जागाही आम्ही जिंकू, असा दावा केला. परभणीतील पत्रकार परिषदेत केंद्रीय सामाजिक न्याय राज्यमंत्री रामदास आठवले यांनी राज्यसभा उमेदवारीवर पहिली प्रतिक्रिया दिली. येत्या 16 मार्च रोजी राज्यसभेच्या सात जागांसाठी महाराष्ट्रात निवडणूक होणार आहे. संख्याबळानुसार, महायुतीचे सहा खासदार सहज निवडून जातील, तर महाविकास आघाडीकडून एक खासदार निवडून जाणार आहे. भाजपच्या वाट्याला राज्यसभेच्या चार जागा येणार असून त्यामध्ये केंद्रीय राज्यमंत्री रामदास आठवले यांना संधी मिळणार आहे. झेडपी, पंचायत समितीच्या अध्यक्ष-सभापती निवडीचा ‘मुहूर्त’ ठरला राज्यातील निवडणुका झालेल्या १२ जिल्हा परिषदा आणि १२५ पंचायत समितीच्या अध्यक्ष आणि सभापती निवडीचा मार्ग मोकळा झाला आहे. या निवडीसाठी पहिली बैठक २० मार्चपूर्वी घेण्याचे निर्देश ग्रामविकास विभागाने आज दिले आहेत. राज्यातील जिल्हा परिषद व पंचायत समितीच्या सार्वत्रिक निवडणुका नऊ फेब्रुवारीला पार पडल्या. या निवडणुकांनंतर अध्यक्ष, उपाध्यक्ष तसेच पंचायत समित्यांमधील सभापती व उपसभापती निवडीसाठी जवळपास निवडणूक झालेल्या सर्वच जिल्ह्यात चुरस पाहायला मिळत आहे. राज्य निवडणूक आयोगाने आज पदाधिकारी निवडीचा कार्यक्रम जाहीर केल्याने, जोरदार रणधुमाळी पाहायला मिळणार आहे.

मुलांच्या ऑनलाईन गेमच्या व्यसनावर सरकार गंभीर Top 10 news: राज्यात वाढत चाललेल्या मुलांच्या डिजिटल व्यसनाच्या पार्श्वभूमीवर महाराष्ट्र सरकारने तज्ज्ञांची टास्क फोर्स स्थापन केली असून पुढील अधिवेशनाच्या आत सविस्तर अहवाल सादर केला जाईल, अशी माहिती राज्याचे माहिती तंत्रज्ञान मंत्री आशिष शेलार यांनी विधान परिषदेत दिली. विधान परिषद सदस्य निरंजन डावखरे आणि संजय केणेकर यांनी लक्षवेधीद्वारे हा विषय उपस्थित केला होता. राज्यात 18 वर्षांखालील सुमारे चार कोटी मुले असून त्यापैकी जवळपास तीन कोटी मुले ही 15 वर्षांखालील आहेत. त्यामुळे डिजिटल व्यसन हा केवळ वैयक्तिक नव्हे तर सार्वजनिक आरोग्याचा गंभीर प्रश्न बनला आहे. गेमिंग अॅप्स, सोशल मीडिया वापरावर वयोमर्यादा, अल्पवयीनांसाठी जाहिरातींवर निर्बंध यांसारख्या उपाययोजनांबाबत प्रश्न उपस्थित करण्यात आले. राज्य सरकारकडून 2 फेब्रुवारी रोजी प्रधान सचिव विरेंद्र सिंह यांना लेखी आदेश देऊन तज्ज्ञ कार्यदल स्थापन करण्याचे निर्देश देण्यात आले. या टास्क फोर्समध्ये शिक्षणतज्ज्ञ, मानसोपचारतज्ज्ञ, तंत्रज्ञान तज्ज्ञ, कायदेतज्ज्ञ, डॉक्टर तसेच संबंधित विभागांचे अधिकारी असतील.

शिंदेसेनेला डच्चू देत भाजप-राष्ट्रवादी एकत्र

रायगड जिल्हा परिषदेच्या सत्ता समीकरणाचा पेच अखेर सुटलाय.भाजपने चक्क शिंदेसेनेला बाजूला करत दादांच्या राष्ट्रवादीशी हातमिळवणी केल्याची चर्चा आहे…त्यामुळे राज्यात ज्या महायुतीच्या जोरावर सत्ता चालवली जातेय, त्याच महायुतीत रायगडमध्ये मोठी ठिणगी पडलीय.एकीकडे विधानभवनाच्या परिसरात भाजप प्रदेशाध्यक्ष रवींद्र चव्हाण, शिंदेसेनेचे मंत्री उदय सामंत आणि भरत गोगावले यांच्यात चर्चा झाली.मात्र या चर्चेतूनही शिंदेसेनेच्या हाती काहीच पडलं नाही त्यामुळे रायगडचा गड जिंकण्यासाठी भाजपने रचलेल्या या चक्रव्यूहात शिंदेसेना विरोधी बाकावर बसणार का? असा प्रश्न विचारल्यावर गोगावलेंनीही त्याची तयारी दाखवलीय.रायगड जिल्हा परिषदेत शिंदेसेनेला 21, अजितदादांच्या राष्ट्रवादीला 16, भाजपला 15, तर ठाकरेसेनेला 5 आणि काँग्रेसला 2 जागा मिळाल्यात… त्यामुळे बहुमतासाठी 30 जागा लागणार असून भाजप आणि राष्ट्रवादी एकत्र आल्यानं दोघांचे संख्याबळ 31 होतंय.

PF क्लेम आता 3 दिवसांत पूर्ण होणार देशातील लाखो नोकरदारांसाठी श्रम मंत्रालयाने ‘EPFO 3.0’ ही अत्यंत महत्त्वाची आणि फायदेशीर योजना सुरू केली आहे. अनेकदा कर्मचारी जुनी नोकरी सोडल्यानंतर जुन्या पीएफ खात्यातील शिल्लक रक्कम काढण्यास विसरतात. अशा प्रलंबित रक्कमेसाठी आता सरकारने ऐतिहासिक निर्णय घेतला असून, ज्या खात्यांमध्ये 1,000 रुपये किंवा त्यापेक्षा कमी रक्कम आहे, ती रक्कम सरकार स्वतःहून कर्मचाऱ्यांच्या बँक खात्यात जमा करणार आहे. त्यामुळे कर्मचाऱ्यांना मोठा दिलासा मिळणार आहे. या नव्या सुविधेमुळे कर्मचाऱ्यांना कोणत्याही सरकारी कार्यालयात हेलपाटे मारण्याची किंवा अर्ज भरण्याची गरज भासणार नाही. तुमचे पीएफ पैसे थेट तुमच्या व्हेरिफाईड बँक खात्यात ट्रान्सफर केले जातील. तसेच, ईपीएफओच्या नव्या प्रणालीमुळे क्लेम सेटलमेंटचा कालावधी कमी होऊन तो आता केवळ 3 दिवसांवर आला आहे. ईपीएफओच्या नियमांनुसार, ज्या पीएफ खात्यात सलग 36 महिने (3 वर्षे) कोणताही नवा हिस्सा जमा होत नाही, ते खाते ‘इनऑपरेटिव्ह’ मानले जाते.

पंतप्रधान मोदींचा नवा इतिहास पंतप्रधान मोदींची लोकप्रियता जगभरात पसरली आहे. आता त्यांच्या नावावर आणखी एक अनोखा विक्रम झाला आहे. पंतप्रधान नरेंद्र मोदी यांनी सोशल मीडिया प्लॅटफॉर्म इंस्टाग्रामवर इतिहास रचला आहे. ते इंस्टाग्रामवर १० कोटी फॉलोअर्सचा ऐतिहासिक टप्पा पार करणारे पहिले जागतिक नेते आणि राजकारणी बनले आहेत. अमेरिकेचे अध्यक्ष डोनाल्ड ट्रम्प देखील पंतप्रधान मोदींच्या तुलनेत मागे पडले आहेत. पंतप्रधान नरेंद्र मोदी यांनी २०१४ मध्ये सोशल मीडिया प्लॅटफॉर्म असलेल्या इंस्टाग्रामचा वापर सुरु केला. मागील दहा वर्षांत, त्यांचे अकाउंट जागतिक नेत्यांमध्ये सर्वात आकर्षक डिजिटल स्पेसपैकी एक बनले आहे. पंतप्रधान मोदींचे इंस्टाग्राम फॉलोअर्स अमेरिकेचे अध्यक्ष डोनाल्ड ट्रम्प यांच्यापेक्षा दुप्पट आहेत. खरं तर जगातील पाच टॉप ग्लोबल नेत्यांचे एकत्रित फॉलोअर्स पंतप्रधान मोदींपेक्षा कमी आहेत.

भारत -इस्रायल मैत्रीचा नवा अध्याय Top 10 news:

पंतप्रधान नरेद्र मोदींचा दोन दिवसांचा महत्त्वाकांक्षी इस्रायल दौरा सुरु झालाय. 25 आणि 26 फेब्रुवारी या दोन दिवसात भारत आणि इस्रायल मैत्री अध्यायात नवा कळस गाठला जाण्याची शक्यता आहे. पंतप्रधान म्हणून नरेंद्र मोदी २०१७ नंतर दुसऱ्यांदा इस्रायल दौऱ्यावर पोहोचलेत.मोदींच्या स्वागतासाठी इस्रायलच्या संसदेला तिरंगी विद्युत रोषणाई करण्यात आलीय. इस्रायलचे पंतप्रधान बेंजामिन नेतान्याहू आणि त्यांची पत्नी सारा यांनी मोदींचं स्वागत केलं. इस्रायलच्या दौऱ्यावर असलेले पंतप्रधान नरेंद्र मोदी यांनी इस्रायली संसदेत (नेसेट) भाषण केले. यावेळी इस्रायली खासदारांमध्ये मोठा उत्साह बघायला मिळाला. यावेळी पंतप्रधान मोदींना इस्रायली संसदेने दिलेला सर्वोच्च सन्मान नेसेट पदक देण्यात आला. दरम्यान, इस्रायली संसदेतून पंतप्रधान मोदींनी दहशतवादाला आश्रय देणाऱ्या आणि त्याला आश्रय देण्यासाठी पाठबळ देणाऱ्या देशांना कडक इशारा दिलाय. त्यांनी भारतात पाकिस्तान पुरस्कृत दहशतवादी हल्ल्याचाही उल्लेख केला. सोबतच भारत-इस्रायल व्यापार कराराबद्दलही त्यांनी भाष्य केलंय.

लग्नानंतरही दोन रशियन महिलांशी प्रेमसंबंध -बिल गेट्स मायक्रोसॉफ्टचे सह-संस्थापक बिल गेट्स यांनी त्यांच्या खासगी आयुष्याबद्दल आणि वादग्रस्त उद्योगपती जेफ्री एपस्टीनसोबतच्या संबंधांबद्दल मोठा खुलासा केलाय. नुकत्याच झालेल्या एका कार्यक्रमात त्यांनी, मेलिंडा फ्रेंच गेट्स यांच्याशी लग्न झालेले असताना त्यांचे दोन रशियन महिलांसोबत प्रेमसंबंध होते असं मान्य केलंय. या कबुलीमुळे जागतिक स्तरावर पुन्हा एकदा खळबळ उडालीय. गेट्स यांनी या चुकीबद्दल जाहीर माफीही मागितलीय. ही घटना 24 फेब्रुवारी रोजी एका टाऊन हॉल सभेदरम्यान समोर आली असून बिल गेट्स यांनी आपल्या भूतकाळातील निर्णयांवर पश्चात्ताप व्यक्त केला.या सभेमध्ये गेट्स यांनी गुन्हेगार जेफ्री एपस्टीनसोबतच्या मैत्रीवरही भाष्य केले. त्यांनी मान्य केले की एपस्टीनच्या गुन्हेगारी पार्श्वभूमीची योग्य तपासणी करण्यात ते अपयशी ठरले. त्यांनी सांगितले की 2014 पर्यंत त्यांनी एपस्टीनच्या भेटी घेतल्या होत्या आणि किमान एकदा त्याच्या प्रायव्हेट जेटने प्रवासही केला होता. मात्र, एपस्टीनच्या कोणत्याही बेकायदेशीर कृत्यांमध्ये आपला सहभाग नव्हता किंवा त्याच्या खासगी बेटावर आपण कधीही गेलो नव्हतो, असा दावा गेट्स यांनी केला आहे.