Top 10 news: राज्य सरकारी कर्मचाऱ्यांच्या महागाई भत्त्यात वाढ, उद्धव ठाकरे राज्यसभेवर जाणार?, जाणून घ्या अशा टॉप १० बातम्या

राज्य सरकारी कर्मचाऱ्यांच्या महागाई भत्त्यात ३% वाढ Top 10 news: राज्य शासकीय आणि अन्य पात्र कर्मचाऱ्यांच्या महागाई भत्त्यात ३ टक्के वाढ करण्याचा महत्त्वपूर्ण निर्णय राज्य सरकारने घेतलाय. या निर्णयानुसार महागाई भत्ता ५५ टक्क्यांवरून ५८ टक्के करण्यात येणार आहे. यासंदर्भात वित्त राज्यमंत्री आशिष जयस्वाल यांनी विधान परिषदेत निवेदन सादर केले. या निर्णयाचा लाभ राज्यातील ५.१६ लाख कर्मचारी आणि सुमारे ८.७२ लाख निवृत्ती वेतनधारकांना मिळणार आहे. मुख्यमंत्री आणि अर्थमंत्री देवेंद्र फडणवीस यांनी राज्यातील लाखो कर्मचाऱ्यांसाठी दिलासादायक ठरणारा असा हा निर्णय घेतला आहे. त्यामुळे सरकारी कर्मचाऱ्यांमध्ये आनंदाचे वातावरण निर्माण झाले आहे. महागाई भत्त्यातील ही वाढ जुलै २०२५ पासून लागू करण्यात येणार आहे. जुलै २०२५ ते ऑक्टोबर २०२५ या कालावधीतील थकबाकीची रक्कम मार्च २०२६ मध्ये कर्मचाऱ्यांना दिली जाईल. शासनाच्या या संवेदनशील आणि सकारात्मक निर्णयामुळे राज्यातील सर्व शासकीय कर्मचाऱ्यांनी मुख्यमंत्र्यांचे आभार मानले आहेत. सरकारच्या या निर्णयामुळे कर्मचाऱ्यांना आर्थिक बळ मिळून त्यांच्या कुटुंबांना दिलासा मिळणार आहे

पार्थ पवार तुमच्यासोबत नाहीत का? राष्ट्रवादी काँग्रेस शरदचंद्र पवार पक्षाचे कर्जत जामखेडचे आमदार रोहित पवार यांनी दिवगंत उपमुख्यमंत्री अजित पवार यांच्या विमान अपघात प्रकरणी व्हीएसआर व्हेंचर्स आणि डीजीसीए विरुद्ध आक्रमक भूमिका घेतलीय. दरम्यान , रोहित पवारांची एफआयआर दाखल करून न घेतल्याने त्यांनी पत्रकार परिषद घेतली यावेळी रोहित पवार यांना पार्थ पवार तुमच्यासोबत नाहीत का? त्यांच्यावर दबाव आहे का? असा प्रश्न पत्रकारांनी विचारला होता. याबाबत बोलताना रोहित पवार म्हणाले की पार्थ त्याच्या लेव्हलवर अधिकाऱ्यांसोबत बोलून लढत असेल. तो लढत नाही असं आपल्याला बोलून चालणार नाही. जय त्याच्या लेव्हलवर तिथं बोलतोय. काकींनी सीबीआयकडे चौकशी द्यावी, अशी मागणी केलीय. त्या त्यांच्या पातळीवर लढत आहेत. सगळे त्यांच्या त्यांच्या परीनं लढत आहेत. फक्त विषय एवढाच आहे, मंदगतीनं दादांच्या अपघाताची चौकशी चालली आहे, असं रोहित पवार म्हणाले. मला वाटत नाही त्यांच्यावर दबाव आहे. ते त्यांच्या लेव्हलनं प्रयत्न करत आहेत, आम्ही आमच्या पातळीवर लढत आहोत, असं रोहित पवार म्हणाले.

उद्धव ठाकरे राज्यसभेवर जाणार? राज्यसभेच्या 7 जागांसाठी निवडणूक जाहीर झाली. यात महाविकास आघाडीला संख्याबळानुसार 1 जागा मिळू शकते. त्यामुळे या एका महाविकास आघाडीत जोरदार रस्सीखेच सुरुय. तर विधानभवनात झालेल्या महाविकास आघाडीच्या बैठकीत तीन्ही पक्षांनी राज्यसभेसाठी आग्रह धरल्यानं महाविकास आघाडीत पेच निर्माण झालाय. खरं तर याआधीच संजय राऊतांनी शरद पवारांनी इच्छा व्यक्त केली तर त्यांना राज्यसभेवर पाठवण्याबाबत महाविकास आघाडीत चर्चा होऊ शकते असं वक्तव्य केलं आणि राज्यसभेच्या निवडणुकीची चर्चा रंगली.आता सुप्रिया सुळेंनीही पवारांच्या राज्यसभेसाठी इच्छा व्यक्त केलीय. यानंतर आता जयंत पाटलांनी सुत्रं हलवायला सुरुवात केली. एकीकडे जयंत पाटील पवारांचा निरोप घेऊन ठाकरेंची भेट घेणार आहेत. तर दुसरीकडे आदित्य ठाकरे मात्र प्रियंका चतुर्वेदींसाठी आग्रही असल्याची चर्चा आहे. तर उद्धव ठाकरेंनी राज्यसभेवर जाऊन राष्ट्रीय राजकारणात सक्रीय व्हावं, असाही एक मतप्रवाह असल्याचं सांगण्यात येत आहे.

राज्यात उकाडा वाढणार; मार्च उष्ण ते अतिउष्ण राहण्याची शक्यता राज्यात ढगाळ हवामानासोबतच उन्हाचा चटका वाढू लागला असून उकाड्याने नागरिक त्रस्त झाले आहेत. आज (ता. २७) कमाल तापमानात सरासरीपेक्षा ३ ते ४ अंशांनी वाढ होण्याची शक्यता हवामान विभागाने वर्तविली आहे. तुरळक ठिकाणी अंशतः ढगाळ हवामान राहील, मात्र उष्णतेची तीव्रता कायम राहणार आहे. भारतीय हवामान विभागाच्या अंदाजानुसार मार्च महिना उष्ण ते अतिउष्ण राहण्याची शक्यता आहे. दुसऱ्या आठवड्यापासून मध्य भारतात (कोकण-महाराष्ट्रासह) तसेच वायव्य भारतातील अनेक भागांत कमाल तापमान ३८ ते ४० अंश सेल्सिअसपर्यंत जाण्याचा अंदाज आहे. २० मार्चनंतर तापमानात आणखी वाढ होण्याची शक्यता व्यक्त करण्यात आली असून नागरिकांनी आरोग्याची विशेष काळजी घ्यावी, असं आवाहन करण्यात आलय.

राज्यातील एका सहकारी बँकेसह एकूण 5 बँकांना आर्थिक दंड Top 10 news:

आरबीआयनं महाराष्ट्रातील विटा मर्चंटस को ऑपरेटिव्ह बँक लिमिटेड, विटा या बँकेला दंड केला आहे. या बँकेला 3.10 लाख रुपयांचा दंड करण्यात आला आहे.नाममात्र सदस्यांना मर्यादेपेक्षा अधिक कर्ज दिल्याचा ठपका बँकेवर ठेवण्यात आला आहे. याशिवाय ज्या कर्जदारांना दंड लावला त्याची माहिती न दिल्याचा ठपका बँकेवर ठेवला गेला आहे. द प्रकाशपुरम को-ऑपरेटिव्ह अर्बन को ऑपरेटिव्ह लिमिटेड, तामिळनाडू 50 हजार रुपयांचा दंड आरबीआयनं केला आहे. बँकेनं लाभांश वाटपासंदर्भात नियम न पाळल्याचा ठपका ठेवला आहे. रिझर्व्ह बँक ऑफ इंडियानं द बेळगा जिल्हा मध्यवर्ती सहकारी बँक लिमिटेड, कर्नाटक या बँकेला 2 लाख रुपये दंड केला आहे. या बँकेला संचालकांच्या कर्जाप्रकरणी आणि इतर कारणांसाठी दंड करण्यात आला.द गुंटूर महिला सहकारी नागरी बँक मर्यादित, आंध्र प्रदेशला 50 हजार रुपयांचा दंड करणयात आला आहे. आरबीआयच्या केवायसी संदर्भातील नियमांची पूर्तता न केल्यानं दंड करण्यात आला. द महबूबनगर जिल्हा सहकारी मध्यवर्ती बँक लिमिटेड तेलंगणा या बँकेला आरबीआयनं 1 लाख रुपयांचा दंड केला आहे. या बँकेनं देखील संचालकाला कर्ज मंजूर केल्याचं आढळून आल्यानं आरबीआयनं ही कारवा केली.

“हे सर्व कोण पाहत आहे?” एनसीईआरटीच्या आठवीच्या सामाजिक शास्त्राच्या पाठ्यपुस्तकात न्यायव्यवस्थेतील भ्रष्टाचाराविषयीच्या एका प्रकरणामुळे मोठा गोंधळ उडाला आहे. सर्वोच्च न्यायालयाने तीव्र नाराजी व्यक्त केली आहे आणि पुस्तकावर बंदी घातली आहे. पंतप्रधान नरेंद्र मोदी यांनीही नाराजी व्यक्त केली आहे.तसेच यासाठीची जबाबदारी निश्चित केली पाहिजे असे म्हटले आहे. सरकारने आता चौकशी सुरू केली आहे. डिजिटल प्लॅटफॉर्मवरून पुस्तक ब्लॉक करण्यासाठी पत्र लिहिले आहे. सरकारी सूत्रांनुसार, पंतप्रधान मोदी या संपूर्ण प्रकरणामुळे खूप नाराज आहेत. त्यांनी विचारले, “हे सर्व कोण पाहत आहे?” आणि जबाबदारी निश्चित करण्याचा आग्रह धरला. इस्रायलहून भारतात परतताना त्यांनी या प्रकरणावर आपले मत व्यक्त केले. सरकार आता हे प्रकरण गांभीर्याने घेत आहे आणि कारवाई करण्याची तयारी करत आहे.

आता हायवेवर हॉटेल, पेट्रोल पंप सुरू करणं झालं सोपं Top 10 news: राष्ट्रीय महामार्गांच्या लगत पेट्रोल पंप, फूड कोर्ट किंवा इतर व्यावसायिक प्रकल्पांसाठी आवश्यक असलेल्या परवानग्या आता अधिक गतीने आणि पारदर्शकपणे मिळणार आहेत. केंद्रीय रस्ते वाहतूक आणि महामार्ग मंत्रालयाने ‘राजमार्ग प्रवेश’ या पोर्टलची अद्ययावत आवृत्ती लाँच केली आहे. केंद्रीय मंत्री नितीन गडकरी यांनी या डिजिटल प्लॅटफॉर्मचे उद्घाटन केले असून, यामुळे लालफितीचा कारभार संपुष्टात येऊन उद्योजकांना मोठा दिलासा मिळणार आहे. त्यामुळे हायवे लगत रेस्टॉरंट असतील किंवा पेट्रोल पंप असतील त्यांना सुरू करण्याचा मार्ग मोकळा होणार आहे. या पोर्टलमुळे आता ‘नो ऑब्जेक्शन सर्टिफिकेट’मिळवण्यासाठी सरकारी कार्यालयांच्या फेऱ्या मारण्याची गरज उरणार नाही. रस्ते जोडणी, रेस्ट एरिया, तसेच गॅस आणि पाणी पाईपलाईन टाकण्यासाठी लागणाऱ्या परवानग्या एका क्लिकवर उपलब्ध होतील. अर्जाची सद्यस्थिती ऑनलाइन पाहता येणार असून, ठराविक कालमर्यादेत मंजुरी देण्याचे बंधनही यंत्रणेवर असेल. त्यामुळी ही प्रक्रीया अत्यंत पारदर्शक असेल अशी काळजी घेण्यात आली आहे. गडकरींच्या पुढाकाराने ही गोष्ट करण्यात आली आहे.

वर्ल्ड इकोनॉमिक फोरमच्या अध्यक्षांचा राजीनामा जेफ्री एपस्टीनशी संबंध असल्याचं समोर येताच जगभरात विविध ठिकाणी राजीनामे होत आहेत.वर्ल्ड इकोनॉमिक फोरमचे अध्यक्ष आणि सीईओ बोर्गे ब्रेंडे यांनी पदाचा राजीनामा दिला आहे. जेफ्री एपस्टीनशी संबंधित फाईल्समध्ये नाव आल्यानंतर बोर्गे ब्रेंडे यांनी राजीनामा दिला आहे. मात्र, राजीनामा पत्रात त्यांनी याचा उल्लेख केलेला नाही.ब्रेंडे 2017 मध्ये वर्ल्ड इकोनॉमक फोरमचे अध्यक्ष झाले होते. ब्रेंडे यांनी एपस्टीनसोबत 3 बिझनेस डिनर केल्याचा आरोप करण्यात आला होता. याशिवाय एपस्टीनसोबत ईमेल आणि टेक्स्ट मेसेज द्वारे संवाद केल्याचा आरोप देखील ब्रेंडेंवर आहे. वर्ल्ड इकोनॉमिक फोरमचे अध्यक्ष बोर्गे ब्रेंडे यांनी गुरुवारी त्यांच्या पदाचा राजीनामा दिला. हा निर्णय लैंगिक शोषण प्रकरणात दोषी ठरलेल्या अमेरिकेच्या जेफ्री एपस्टीनशी संबंधित फाईल्समध्ये ब्रेंडे यांचं नाव आल्यानंतर घेण्यात आला आहे. ब्रेंडे राजीनाम्याबाबदल म्हणाले की खूप विचारपूर्वक वर्ल्ड इकोनॉमिक फोरमचे अध्यक्षपद आणि सीईओपद सोडण्याचा निर्णय घेतला आहे.

अफगाणिस्ताननं घेतला एअरस्ट्राइकचा बदला Top 10 news: पाकिस्ताननं दहशतवादी ठिकाणांवर हल्ले करण्याच्या नावाखाली अफगाणिस्तानात एअर स्ट्राईक केला होता. ज्यामध्ये अफगाणिस्तानच्या नागरिकांचा मृत्यू झाला होता. पाकिस्तानच्या सैन्याच्या कारवाईचा बदला तालिबान सरकारनं घेण्यासाठी हल्ले सुरु केले आहेत. दोन्ही देशांमध्ये 48 तासांपासून गोळीबार सुरु असल्याची माहिती आहे.अफगाणिस्तान सरकारचे प्रवक्ते जबीुल्लाह मुजाहिद यांनी म्हटलं की सर्वसामान्य नागरिकांवर पाकिस्ताननं केलेल्या हल्ल्याचा बदला घेण्यासाठी आमच्या सैन्यानं पाकिस्तानच्या केंद्रावर आणि सैन्य ठिकाणांवर हल्ले सुरु केले आहेत. अफगाणिस्ताननं पाकिस्तान विरुद्ध मल्टी बॅरल रॉकेट लाँचरचा वापर करुन हल्ला केला आहे. तालिबान सरकारच्या प्रवक्त्यांनी दावा केला की पाकिस्तानच्या 15 लष्करी ठिकाणांवर ताबा मिळवला आहे. याशिवाय पाकिस्तानच्या सैन्याला मारल्याचा दावा देखील केला आहे.

भारताचा क्रिकेटपटू रिंकू सिंहच्या वडिलांचे निधन

भारतीय क्रिकेट संघाचा आघाडीचा फलंदाज रिंकू सिंह याच्यावर दु:खाचा डोंगर कोसळला आहे. रिंकू सिंह याचे वडील खचंद्र सिंह यांचे शुक्रवारी पहाटे निधन झाले. खचंद्र सिंह यांनी स्टेज-4 चा यकृताचा कर्करोग होता. अलीकडेच त्यांची प्रकृती अचानक खालावल्याने त्यांना ग्रेटर नोएडा येथील यथार्थ रुग्णालयात दाखल करण्यात आले होते. वडिलांची प्रकृती खालावल्याचे समजल्यानंतर रिंकू सिंह टीम इंडियाची साथ सोडून घरी परतला होता. गेल्या दोन दिवसांपासून रिंकू सिंहच्या वडिलांची प्रकृती चिंतानजक होती. त्यांना कृत्रिम श्वसनप्रणालीवर ठेवण्यात आले. अखेर आज पहाटे त्यांनी अखेरचा श्वास घेतला. रिंकू 24 फेब्रुवारी रोजी चेन्नई सोडत प्रथम दिल्लीला पोहोचला आणि नंतर ग्रेटर नोएडा येथे रुग्णालयात दाखल असलेल्या वडिलांना भेटला होता. हीच त्यांची अखेरची भेट ठरली.