नाशिक : कळवणमधून एक धक्कादायक घटना समोर आली आहे. या ठिकाणी एका ग्रामसेवकाच्या पत्नीने विष पिऊन आत्महत्येचा प्रयत्न केला. आमदार नितीन पवार आपल्या पतीला वारंवार त्रास देत असल्याचा आरोप करत या महिलेने विष प्राशन केले. तसेच विधानसभा निवडणुकीत आपण विरोधात काम केल्याचा राग काढत असल्याचं महिलेने आपल्या तक्रारीत म्हंटले आहे.
काय आहे नेमके प्रकरण?
कळवण येथील शीतल महाजन यांचे पती रामराव महाजन हे ग्रामसवेक असून कळवणचे आमदार नितीन पवार आणि जयश्री पवार हे त्यांना कोणत्या ना कोणत्या कारणाने खोट्या तक्रारी करून वरिष्ठ अधिकाऱ्याना चौकशीसाठी पाठवत असतात. यामुळे त्यांची पत्नी शीतल महाजन यांना मानसिक त्रास होत असल्यामुळे त्यांनी टोकाचे पाऊल उचलले विषारी औषधं घेऊन आत्महत्या करण्याचा प्रयत्न केला.
विधानसभा निवडणुकीत शीतल महाजन यांनी आमदार नितीन पवार व जयश्री पवार यांच्या विरोधात काम केल्यामुळे पती ग्रामसेवकाला खोट्या तक्रारी करून अडकविण्याचा प्रयत्न केला जात आहे. मात्र अनेकवेळा चौकशी होऊनही तक्रारीत तथ्य आढळेल नाही. तरीही त्रास सुरूच होता असेदेखील शीतल महाजन म्हणाल्या आहेत. तसेच महिलेने केलेल्या आरोपात कुठलंही तथ्य नसल्याचं म्हणत आमदार पवारांनी सर्व आरोप फेटाळून लावले आहेत.
