नगर(प्रतिनिधी) – नगर जिल्ह्यात पुणे-नाशिक महामार्गावर दोन महिन्यांत तीन हजार 400 वाहनचालकांनी वेगमर्यादेचे उल्लंघन केले आहे. त्यात कारचालकांची संख्या 95 टक्क्यांपेक्षा जास्त आहे. महामार्ग पोलिसांकडे दोन महिन्यांपूर्वी दाखल झालेल्या अत्याधुनिक इंटरसेप्टर वाहनांमधील स्पीडगन कॅमेऱ्याने ही वेगमर्यादा पकडली आहे. तिचे उल्लंघन केल्याप्रकरणी वाहनचालकांना एक हजार रुपयांचा दंड करण्यात आला आहे. सरासरी 50 वाहनचालकांवर दररोज पुणे-नाशिक महामार्गावर अशी कारवाई होते.
भरधाव वेगात वाहन चालविणे हे अपघाताचे प्रमुख कारण आहे. महामार्गावर वेगाची मर्यादी किती असावी, याचे फलक लावण्यात आले आहेत. कार वाहनासाठी ताशी 90 किलोमीटरची, तर ट्रक व इतर वाहन चालकांसाठी ताशी 80 किलोमीटरची वेगमर्यादा आहे. धोक्याच्या ठिकाणी अपघात होऊ नयेत, वाहनांवरील नियंत्रण सुटू नये म्हणून ही वेगमर्यादा आहे. मात्र, अनेक वाहनचालक ही मर्यादा पाळत नाहीत. पोलिस दलाच्या आधुनिकीकरण कार्यक्रमांतर्गत स्पीडगन कॅमेऱ्यासह सुसज्ज इंटरसेप्टर व्हेइकल या अध्याधुनिक वाहनाचा समावेश करण्यात आला आहे. राज्यात अशी 95 वाहने घेण्यात आली आहेत. नगर जिल्ह्यातील महामार्ग पोलिसांच्या चार केंद्रांना चार इंटरसेप्टर व्हेइकल मिळाली आहेत. केडगाव, बाभळेश्वर, डोळासणे, तिसगाव या चार केंद्रांना ही वाहने दोन महिन्यांपूर्वी मिळाली आहेत.
वाहतुकीचे नियम मोडणाऱ्या वाहनांना न थांबविता तीनशे मीटर अंतरावर वाहनांच्या वेगांची तपासणी करणारी यंत्रणा या वाहनांत आहे. कॅमेऱ्याद्वारे गाडीचा फोटो काढला जातो. त्या गाडीचालकाच्या मोबाइलवर वेगमर्यादा ओलांडल्याचा मेसेज येऊन एक हजार रुपये दंड केल्याचे ई-चलन येत आहे. महिन्याभरात जिल्ह्यातील महामार्गांवर चार हजार 437 हजार 804 वाहनचालकांनी वेगाच्या मर्यादेचे उल्लंघन केल्याचे उघडकीस आले आहे. त्यात 95 टक्के कार, जीपचालक आहेत, तर ट्रक, खासगी बस ही वाहने मोजकीच आहेत. नगर-नाशिक महार्गावरील डोळासणे केंद्रावर तीन हजार 405 वाहनांनी वेगमर्यादेचे उल्लंघन केल्याचे लक्षात आले आहे. त्यात तीन हजार 361 कारचालक आहेत, तर महामार्ग पोलिसांच्या केडगाव केंद्रांतर्गत येणाऱ्या नगर-पुणे महामार्गावर 425 वाहनचालकांनी वेगाच्या मर्यादेचे उल्लंघन केल्याची नोंद आहे.
एका कारचा वेग ताशी 149 किलोमीटर
वाहनाच्या वेगमर्यादेच्या तपासणीत नाशिक-पुणे महामार्गावर काही दिवसांपूर्वी सर्वाधिक वेगाने जाणारी एक कार आढळली होती. ही कार ताशी 149 किलोमीटर वेगाने धावत होती. या कारचालकाला एक हजार रुपयांचा दंड करण्यात आला आहे. या कारला एखादे वाहन आडवे आले असते, ब्रेक दाबला असता, तर मोठा अपघात झाला असता. वाहनांना महामार्गावर वेगाची मर्यादा घालून दिली आहे. इंटरसेप्टर वाहनांमधील स्पीडगन कॅमेऱ्यामुळे वाहनचालकांची वेगमर्यादा सहज कळते. ही वाहने महामार्गाच्या कडेला लावल्यानंतर वाहनांची वेगमर्यादा मोजतात; तसेच वाहनाचा फोटो काढता येतो. नाशिक-पुणे महामार्गावर गेल्या दोन महिन्यांत तब्बल तीन हजार 405 वाहनांवर कारवाई झाली असून, त्यात कारचालकांची संख्या 90 टक्क्यांपेक्षा जास्त आहे.
भालचंद्र शिंदे, उपनिरीक्षक, महामार्ग पोलिस, डोळासणे केंद्र