पुणे : राष्ट्रीय पुस्तक न्यासाच्या वतीने होणाऱ्या पुणे पुस्तक महोत्सवाची जय्यत तयारी सुरू असतानाच, विद्यार्थी, शिक्षक, प्राध्यापक, प्राचार्य, ग्रंथपाल यांच्या सहभागाने यंदाचा पुणे पुस्तक महोत्सव अधिक भव्य होणार आहे. त्याचाच एक भाग म्हणजे राज्याचे उच्च शिक्षण संचालक डॉ. शैलेंद्र देवळाणकर यांनी सावित्रीबाई फुले पुणे विद्यापीठ आणि उच्च शिक्षण सहसंचालक कार्यालयाच्या अखत्यारीत असणाऱ्या महाविद्यालयातील विद्यार्थी, प्राध्यापक, प्राचार्य आणि कर्मचाऱ्यांना महोत्सवात सहभागी होण्याबाबत सूचना केल्या आहेत.
एनबीटीच्या वतीने फर्गसन महाविद्यालयाच्या प्रांगणावर दि. १४ ते २२ डिसेंबर या कालावधीत पुणे पुस्तक महोत्सव रंगणार आहे. या महोत्सवात सावित्रीबाई फुले पुणे विद्यापीठाचे शैक्षणिक विभाग आणि संलग्न महाविद्यालयातील विद्यार्थी, प्राध्यापकांनी सहभागी होत वाचन संस्कृतीला बळ देण्यासाठी पुढे येण्याचे आवाहन डॉ. देवळाणकर यांनी केले आहे.
महाविद्यालयाच्या प्राचार्यांनी पुणे पुस्तक महोत्सवाची सविस्तर माहिती विद्यार्थ्यांपर्यंत पोहोचण्याच्या दृष्टीने, महाविद्यालयात आणि वर्गांमध्ये माहिती द्यायची आहे. त्याचप्रमाणे महाविद्यालयाच्या सूचना फलकांवर महोत्सवाची माहिती आणि विविध उपक्रमांना प्रसिद्धी द्यायची आहे. पुणे आणि पिंपरी चिंचवड परिसरातील खासगी विद्यापीठांनाही महोत्सवात आपला सहभाग नोंदवता येणार आहे. या महोत्सवात पालक वर्गाला सहभागी करण्यासाठी, त्यांच्यापर्यंत माहिती पोहोचवावी, असे आवाहनही डॉ. देवळाणकर यांनी केले आहे.
नामवंतांना भेटण्याची संधी
पुणे पुस्तक महोत्सवात शांतता…पुणेकर वाचत आहे, ज्ञानसरिता ग्रंथ दिंडी, ग्रंथपालांचे संमेलन असे सुरुवातीच्या टप्प्यात काही उपक्रम आहेत. याप्रसंगी शास्त्रज्ञ, शिक्षणतज्ज्ञ, साहित्यिक, कवी, लेखक, चित्रकार, पत्रकार, उद्योजक यांना भेटण्याची संधी मिळणार आहे, अशी माहिती पुणे पुस्तक महोत्सवाचे संयोजक राजेश पांडे यांनी दिली.
