जुन्नर (वार्ताहर) – ओझर (ता. जुन्नर) येथील विघ्नहराच्या मंदिरातुन चोरट्यांनी मंगळवारी (दि. २८) पहाटे दागिने व दानपेटी लांबविल्याची घटना घडली आहे. मंदिराच्या मागील बाजूने आलेल्या चोरट्यांनी पहाटे ३ च्या सुमारास केलेली ही चोरी सीसीटीव्हीमध्ये कैद झाली आहे.
मंगळवारी सकाळी ही घटना कर्मचाऱ्यांच्या लक्षात आली असून उपविभागीय पोलीस अधिकारी दीपाली खन्ना, स्थानिक गुन्हा अन्वेषण पुणे ग्रामीणचे पोलीस अधिकारी मांजरे व ओतूर सहाय्यक पोलीस निरीक्षक परशुराम कांबळे घटनास्थळी दाखल झाले आहेत. अष्टविनायकांपैकी श्रद्धास्थान असलेल्या या एक मंदिरात कडेकोट सुरक्षा व्यवस्था असते. मात्र या बंदीच्या विघ्नहराच्या मंदिरातून चोरट्यांनी सोन्याचा मुलामा दिलेली सुमारे २ किलो वजनाची चांदीची छत्री आणि दानपेटी लंपास केली आहे.
दरम्यान लॉकडाऊन कालावधीत बाप्पाचे इतर दागिने लॉकरमध्ये असल्यामुळे मोठा अनर्थ टळल्याचे सांगण्यात येत आहे. चोरट्यांनी ही दानपेटी मंदीराच्या बाहेरील बाजूस टाकून दिल्याचे आढळून आले आहे. सीसीटीव्ही फुटेजमध्ये दोन चोरटे दिसत असून पोलीस पुढील तपास करीत आहे. या घटनेनंतर पोलीस अधिकारी, देवस्थानचे ट्रस्टी व ग्रामस्थांमध्ये तातडीची बैठक घेण्यात आली असून अधिक माहिती जमा करण्याचे काम सुरू आहे. दरम्यान परिसरातील सुरक्षा व्यवस्था वाढवण्याची मागणी सरपंच अस्मिता कवडे व ग्रामस्थांनी केली आहे.