शाळा डिजिटल करून उत्तम पद्धतीचे शिक्षण देणार : शेखर गायकवाड
पुणे – सर्वसामान्य नागरिकांसाठी असलेल्या योजना कागदावरच न राहता प्रत्यक्षात आणणार आहे. तसेच, महापालिका हद्दीतील शाळा डिजिटल करून विद्यार्थ्यांना उत्तम पद्धतीचे शिक्षण देणार असल्याचे नवनियुक्‍त आयुक्‍त शेखर गायकवाड यांनी सोमवारी स्पष्ट केले.
महापालिकेचा अर्थसंकल्प सादर केल्यानंतर आयोजित पत्रकार परिषदेत आयुक्‍तांनी शहरातील वाहतूक प्रश्‍न, बीआरटी योजना, सायकल ट्रॅक, घरकूल प्रकल्प यासारख्या विविध विषयांवरील मुद्दे मांडले.राज्य शासनाच्या धर्तीवर महापालिकेचे पुरवणी अंदाजपत्रक सादर केल्याने प्रशासनावरील दबाव कमी होणार आहे. याचबरोबर, महापालिकेच्या तिजोरीत कराच्या माध्यमातून पैसे येतील त्याप्रमाणे खर्च करण्यात येणार आहेत. शहरातील कोणत्याही भागात सायकल ट्रॅक अखंडपणे नसल्याने नागरिकांना त्रास सहन करावा लागत आहे. त्यामुळे, शहरात अखंडपणे सायकल ट्रॅक उभारण्यात येणार आहेत. याचबरोबर, शहरातील घरकूल प्रकल्पांचे काम सुरू असून ते लवकरात-लवकर पूर्ण करण्यात येणार असल्याचे त्यांनी स्पष्ट केले.
पुढील 50 वर्षांचे व्हिजन
राज्य आणि केंद्र सरकारच्या विविध योजना पूर्ण करण्यावर भर दिला जात आहे. मात्र, महापालिकेच्या माध्यमातून सुरू होणारे विविध प्रकल्प पुढील 50 वर्षांचे व्हिजन डोळ्यासमोर ठेवून तयार करण्यात येणार आहे. त्यामुळे, या योजना अथवा प्रकल्पांचा लाभ नागरिकांना पुढील काळात होणार असल्याचे गायकवाड यांनी सांगितले.
शहरात दोन फ्रि-वे मार्गांसाठी चाचपणी
शहरात वाहतुकीची समस्या सोडविण्यावर जास्तीत-जास्त भर दिला जाणार आहे. सुमारे 40 ते 50 मिनिटांत वाहनचालक शहराच्या बाहेर पडला पाहिजे. तसेच, मुंबईच्या धर्तीवर पुण्यातही शहराच्या बाहेर जाण्यासाठी व शहरात येण्यासाठी दोन फ्रि-वे तयार करण्यासंदर्भात चाचपणी सुरू आहे. या प्रकल्पामुळे नागरिकांचा आर्थिक व वेळेची बचत होणार असल्याचे आयुक्‍तांनी सांगितले.
शहरातील अरुंद रस्त्यांवर सोलार व ई-बस
शहरातील अंतर्गत भागांत अरुंद रस्ते असल्याने पीएमपी बसमुळे वाहतूक कोंडी होते. त्यासाठी, लहान आकाराच्या सोलार बस व ई-बस उपलब्ध करण्यात येतील. या बस वाहतूक कोंडी कमी करण्यासाठी पर्याय ठरू शकणार असल्याचे आयुक्‍तांनी स्पष्ट केले.
बीआरटी योजना आंधळेपणाने राबविली
बीआरटी योजनेमुळे इतर वाहतुकीला अडथळा निर्माण होत आहे. शहरात बीआरटी योजना आंधळेपणाने राबविण्यात आल्याने वाहतुकीचे अनेक प्रश्‍न निर्माण झाले आहेत. यापुढे, बीआरटी मार्गाचा अभ्यास करण्यासाठी वाहतूक तज्ज्ञांचे मार्गदर्शन घेणार असल्याचे आयुक्‍तांनी सांगितले.
आयुक्‍तांच्या अंदाजपत्रकातील ठळक बाबी
राज्य शासनाच्या धर्तीवर पालिकेचेही पुरवणी अंदाजपत्रक
शासकीय जागांचा पार्किंगसाठी वापर
शासकीय जागांवर चार्जिंग स्टेशन उभारणार
सायकल मार्गांचे सलगीकरण करणार
मिळकतकर थकबाकी वसुलीसाठी अभय योजनेचे संकेत
वाहतूक जनजागृतीसाठी ट्रॅफिक पार्क
बीआरटी मार्ग दुचाकीसाठी खुला करण्याबाबत चाचपणी
बाणेर येथे नोकरदार महिलांसाठी वसतिगृह
मेट्रोचे 8 ते 10 नवे मार्ग प्रस्तावित करणार
आवास योजनेत 10 हजार घरांची उभारणी
भूजल साठा वाढविण्यासाठी विशेष उपक्रम
भोगवटा पत्रानंतर एका महिन्यात कर आकारणी करणार
शिक्षण व आरोग्य विभागाचा स्वतंत्र आराखडा करणार
मुळ हद्द व 23 गावांमध्ये टीपी स्कीम राबविणार
एचसीएमटीआर प्रकल्पाला गती देणार
