पणजी – अनेक राजकीय पक्ष मैदानात उतरल्याने यावेळच्या गोवा विधानसभा निवडणुकीला बहुरंगी लढतीचे स्वरूप प्राप्त झाले आहे. त्या निवडणुकीची रंगत पाच दाम्पत्ये रिंगणात उतरल्याने आणखीच वाढली आहे. गोव्यातील सत्तारूढ भाजपने दोन दाम्पत्यांना उमेदवारी दिली आहे. त्यामध्ये विश्वजीत राणे, दिव्या राणे आणि अतानासिओ मोन्सेरात, जेनिफर मोन्सेरात यांचा समावेश आहे. त्याशिवाय, भाजपचे उमेदवार चंद्रकांत कवलेकर यांच्या पत्नी सावित्री इतर मतदारसंघातून अपक्ष म्हणून निवडणूक लढवत आहेत.
कॉंग्रेसने मायकेल लोबो आणि त्यांच्या पत्नी डेलिला यांना उमेदवारी दिली आहे. तर, तृणमूल कॉंग्रेसने किरण आणि कविता कांदोलकर या दाम्पत्याला रिंगणात उतरवले आहे. पाचही दाम्पत्ये विजयी झाल्यास त्यांचे गोवा विधानसभेतील संख्याबळ एक-चतुर्थांश इतके होईल. त्या विधानसभेचे एकूण संख्याबळ 40 इतके आहे. गोव्यात विधानसभा निवडणुकीसाठी 14 फेब्रुवारीला मतदान होईल. तेथील निकाल उत्तरप्रदेश, पंजाब, उत्तराखंड आणि मणिपूरबरोबरच 10 मार्चला जाहीर केला जाईल. प्रमुख लढत भाजप आणि कॉंग्रेसमध्ये अपेक्षित आहे. मात्र, तृणमूल आणि आम आदमी पक्षही गोव्यात ताकद आजमावत आहेत.