Watermelon Death Case : मृतांचा मेंदू, हृदय आणि….; कलिंगड खाऊन कुटुंबातील त्या मृत्यूप्रकरणी धक्कादायक माहिती समोर

Watermelon Death Case : मुंबई येथील पायधूनी परिसरात डोकाडिया कुटुंबातील चार सदस्यांच्या संशयास्पद मृत्यू प्रकरणात नवे धक्कादायक तपशील समोर आले आहेत. प्राथमिक फॉरेन्सिक तपासणीत मृतांच्या महत्त्वाच्या अवयवांचा रंग हिरवट झाल्याचे आढळून आले असून, त्यामुळे विषबाधेचा संशय अधिक गडद झाला आहे.

मिळालेल्या माहितीनुसार, मृतांच्या मेंदू, हृदय आणि आतड्यांमध्ये असामान्य बदल दिसून आले आहेत. तज्ज्ञांच्या मते, सामान्य अन्न विषबाधेपेक्षा ही स्थिती वेगळी असून एखाद्या विषारी घटकाचा शरीरात वेगाने प्रसार झाल्याची शक्यता व्यक्त करण्यात येत आहे. तसेच कुटुंबप्रमुख अब्दुल्ला यांच्या शरीरात मोर्फिन आढळल्याची धक्कादायक माहितीही समोर आली आहे.

मॉर्फिन नेमकं काय आहे? (Watermelon Death Case) ‘मॉर्फिन’ हे शक्तिशाली वेदनाशामक औषध असून हे सहसा कॅन्सरसारख्या आजारात किंवा शस्त्रक्रियेनंतरच्या तीव्र वेदना कमी करण्यासाठी वापरले जाते. हे औषध अफूच्या झाडाच्या बियांपासून किंवा लेटेक्सपासून तयार केले जाते. हे औषध ‘ओपिओइड ऍनाल्जेसिक’ किंवा ‘नार्कोटिक्स’ या वर्गात येते. मात्र, एका सामान्य कुटुंबातील व्यक्तीच्या शरीरात या औषधाचा अंश आढळून आल्याने अनेक प्रश्न निर्माण झाले आहेत. या धक्कादायक माहितीमुळे पोलिसही चक्रावले आहेत.

दरम्यान, अन्न व औषध प्रशासन (FDA) कडून स्वतंत्र तपास सुरू करण्यात आला आहे. अधिकाऱ्यांनी घरातून 11 अन्नपदार्थांचे नमुने जप्त करून प्रयोगशाळेत पाठवले आहेत. यामध्ये बिर्याणी, कलिंगड, पाणी, भात, चिकन, खजूर आणि मसाल्यांचा समावेश आहे.

या प्रकरणात पोलिसांनी मृतांचे मोबाईल फोन जप्त केले असून कोणतेही संशयास्पद संपर्क होते का, याचीही चौकशी सुरू आहे. तसेच कुटुंबप्रमुखांच्या व्यावसायिक आणि बँक व्यवहारांचीही तपासणी केली जात आहे.

नेमकं काय घडलं होतं? (Watermelon Death Case ) 25 एप्रिल रोजी मुंबई येथील पायधूनी परिसरातील डोकाडिया कुटुंबातील चार सदस्यांना कलिंगड खाल्ल्यानंतर संशयास्पदरित्या मृत्यू झाला. मृत्यूच्या अगोदर या सर्वांना उलट्या, चक्कर आणि पोटदुखीचा त्रास सुरू झाला. 26 एप्रिल रोजी प्रकृती अधिक बिघडल्याने सर्वांना रुग्णालयात दाखल करण्यात आले. मात्र उपचारादरम्यान एकामागोमाग चौघांचाही मृत्यू झाला.

या संपूर्ण प्रकरणामुळे अनेक प्रश्न निर्माण झाले असून, नेमके मृत्यूचे कारण काय याचा तपास सध्या वेगाने सुरू आहे. पोलिसांनी आता त्या कलिंगड विक्रेत्यापासून ते कुटुंबाच्या औषधोपचाराच्या सर्व बाजूंनी तपास सुरू केला आहे. त्यामुळे आता या प्रकरणात आणखी कोणती माहिती समोर येते याकडे लक्ष लागले आहे.

हेही वाचा : Banana Eating Benefits And Side Effects: उन्हाळ्यात केळं खाणं फायदेशीर की नुकसानकारक? जाणून घ्या संपूर्ण सत्य