संगमनेर – उत्तर नगर जिल्ह्यातील 182 दुष्काळी गावांना वरदान ठरणाऱ्या निळवंडे धरणाच्या डाव्या कालव्यातून येणाऱ्या पाण्याचे पूजन धरणासाठी व कालव्यासाठी सातत्याने काम करणारे आ. बाळासाहेब थोरात यांच्या हस्ते मोठ्या जल्लोषपूर्ण वातावरणात झाले. हा तालुक्‍यासाठी ऐतिहासिक क्षण असल्याचे प्रतिपादन आ. थोरात यांनी या वेळी केले.
या वेळी माजी आ. डॉ. सुधीर तांबे, कॅन्सरतज्ज्ञ डॉ. जयश्री थोरात, ऍड. माधव कानवडे, बाबासाहेब ओहोळ, रामहरी कातोरे, नवनाथ आरगडे, मिलिंद कानवडे, संतोष हासे, विश्‍वास मुर्तडक, उत्तम घोरपडे आदी उपस्थित होते. पिंपळगाव कोंझिरे बोगद्यालगत तालुक्‍यातील कार्यकर्त्यांतर्फे कालव्यांच्या दुतर्फा मोठी विद्युत रोषणाई करण्यात आली होती.
या वेळी आ. थोरात यांची पारंपरिक वाद्यात ग्रामस्थांनी मोठी मिरवणूक काढली. आकर्षक आतिषबाजी, ढोल-ताशांचा गजर, पारंपरिक वाद्य, सुवासिनीचे औक्षण यांसह आबालवृद्धांसह सर्वांचा जल्लोष हे या सोहळ्याची वैशिष्ट्ये ठरली. आ. थोरात यांच्या संकल्पनेतून सायंकाळी कालव्याच्या किनारी कार्यकर्त्यांनी भजन व अभंग गाऊन वातावरण मंत्रमुग्ध केले.
आ. थोरात म्हणाले की, निळवंडे धरण व कालवे व्हावे हे आपले स्वप्न होते. प्रत्यक्षात कामाला 1999पासून गती मिळाली. अनेक अडचणीवर मात करून धरण पूर्ण केले. कालव्यासाठी मोठा निधी मिळवला. इतक्‍या दिवसाच्या अथक परिश्रमानंतर तालुक्‍यात आलेले पाणी हा जीवनातील आनंदाचा क्षण आहे. याचबरोबर तालुक्‍यासाठी ऐतिहासिक क्षण असून, यामुळे दुष्काळी भागातील जनतेच्या जीवनात मोठे परिवर्तन होणार आहे.
आमदार डॉ. तांबे म्हणाले की, आ. थोरात यांनी जीवनाचे ध्येय मानून धरण व कालव्यांची कामे पूर्ण केली. दुष्काळी माणूस व गरिबांच्या जीवनात आनंद निर्माण व्हावा यासाठी हे काम केले असून, ही स्वप्नपूर्ती होत असल्याने हा तालुक्‍याच्या भाग्याचा दिवस ठरत आहे. कालव्यांमधून येणारे पाणी व कालवे पाहण्यासाठी दुष्काळी भागातील नागरिकांसह शहरातील नागरिक, महिला, तरुण यांसह यांनी गर्दी केली होती.
अनेकांची श्रेयासाठी धडपड!
अनेक जण श्रेयासाठी झटत आहेत. आपण कधीही श्रेयासाठी काम केले नाही. मात्र, आपण कामाला महत्त्व देतो धरण व कालव्यांची कामे कोणी केली हेही जनतेला माहीत आहे. या यशामध्ये अनेकांचे योगदान आहे. अनेकांनी त्याग केला असल्याचेही आ. थोरात यांनी म्हटले आहे.
