न्यूयॉर्क: ब्रिटनच्या राजघराण्यातील डचेस ऑफ ससेक्स मेगन मार्कल यांना दुसऱ्यांदा आई बनल्या आहेत. प्रिन्स हॅरी यांची पत्नी मेगन मार्कल यांनी एका कन्येला जन्म दिला आहे. तिचे नाव लिलिबेट डायना असे ठेवण्यात आले आहे. ब्रिटीश राजघराण्यामध्ये मागील काळात उदभवलेल्या वादळाच्या परिस्थितीनंतर आता राजघराण्यातील या नव्या पाहुणीचा जन्म कॅलिफोर्निया येथे झाला.
लिली हे नाव मुलीची पणजी म्हणजे, राणी एलिझाबेथ यांच्या नावावरुन ठेवण्यात आले. लिलिबेट या नावाने राणी एलिझाबेथ यांना कुटुंबात प्रेमाने संबोधण्यात येते. तर मुलीचे डायना हे नाव तिच्या आजीवरून म्हणजे प्रिन्स हॅरी यांच्या दिवंगत आईच्या नावारुन ठेवण्यात आले आहे. प्रिन्सेस ऑफ वेल्स डायना, यांना या माध्यमातून आदरांजली वाहण्यात आली आहे. प्रिन्स हॅरी आणि मेगन मार्कल यांनी एका पत्रकाच्या माध्यमातून ही माहिती दिली.
प्रिन्स हॅरी आणि मेगन मार्कल यांच्या प्रवक्त्यांनी दिलेल्या माहितीनुसार, शुक्रवारी मेगन यांनी एका सुदृढ बालकाला जन्म दिला. रविवारी याबाबतची अधिकृत घोषणा करत या दाम्पत्याने त्यांचे दुसरे मुल, लिलिबेट लिली डायना माऊंटबेटन विंडसर हिचे स्वागत केल्याचे सांगितले. राजघराण्यातील ही लाडाची लेक प्रिन्स हॅरी आणि मेगन यांचे दुसरे बाळ आहे.
शाही कुटुंबाकडून ही आनंदवार्ता सर्वांनाच देण्यात आलेली असली तरीही बाळाचा फोटो मात्र अद्यापही माध्यमांमध्ये प्रसिद्ध करण्यात आलेला नाही. ब्रिटनच्या राजघराण्यापासून प्रिन्स हॅरी यांनी काहीसा दुरावा पत्करलेल्या असल्याच्या काळातच त्यांच्या मुलीचा जन्म झाला आहे. असं असलं तरीही सोशल मीडियाच्या माध्यमातून अनेक हितचिंतकांनी प्रिन्स हॅरी आणि मेगन मार्कल यांच्यावर शुभेच्छांचा वर्षाव केला आहे.
