डब्लिन – भारताने टी-20 सामन्यांच्या मालिकेतील दुसराही सामना जिंकत मालिकाही जिंकली. या लढतीत भारताने द्विशतकी धावसंख्या उभारुनही आयर्लंडच्या फलंदाजांनी दिलेल्या अविश्‍वसनीय कामगिरी केली मात्र, त्यांचा अनुभव कमी पडला व भारताचा अवघ्या चार धावांनी विजय मिळवला.
– दोन्ही सामने भारताने जिंकले
– भारताचा आयर्लंडला व्हाइटवॉश
– दीपक हुडाची शतकी खेळी
– सॅमसनचेही वादळी अर्धशतक
– दीपक हुडा सामन्यासह मालिकेचाही मानकरी
भारताचा कर्णधार हार्दिक पंड्याने नाणेफेक जिंकत पहिल्यांदा फलंदाजी करण्याचा निर्णय घेतला. सलामीवीर ईशान किशनने निराशा केली. मात्र, संजू सॅमसन व जीरक हुडा यांनी दीडशतकी भागीदारी करत संघाचा डाव सावरला. हुडाने वादळी फलंदाजी करत अर्धशतक पूर्ण केले तर सॅमसननेही आक्रमक खेळ करत अर्धशतकी पल्ला पार केला. भरात आलेला सॅमसन 77 धावांवर बाद झाला. त्याने या खेळीत 42 चेंडूंचा सामना करताना 9 चौकार व 4 षटकारांची आतषबाजी केली.
तो बाद झाल्यावर मात्र, सूर्यकुमार यादव 15 व कर्णधार हार्दिक पंड्याने नाबाद 13 धावा करत हुडाला सुरेख साथ दिली. हुडाने आपले शतक थाटात पूर्ण केले. 104 धावांच्या या खेळीत हुडाने 57 चेंडूत 9 चौकार व 6 षटकारांची फचकेबाजी केली. या कामगिरीच्या जोरावर भारताने 20 षटकांत 7 गडी गमावून 225 असा धावांचा डोंगर उभा केला. मार्क अडेरने 3 तर, जोश लिटील व क्रेग यंग यांनी प्रत्येकी 2 गडी बाद केले.
भारताने विजयासाठी दिलेले 226 धावांच्या आव्हानाचा पाठलाग करताना आयर्लंडने अखेरपर्यंत अफलातून लढत दिली. सलामीवीर पॉल स्टर्लिंग आणि कर्णधार अँड्रयू बालबर्नी यांनी संघाला 70 धावांची सलामी दिली. स्टर्लिंग 40 धावा करून बाद झाला तर लगेचच गॅरेथ डेलानीनेही निराशा केली. कर्णधार बालबर्नीने आपले अर्धशतक पूर्ण केले. हॅरी टेक्‍टरने 28 चेंडूत 39 धावांची आक्रमक खेळी करत भारतीय गोटात चिंता निर्माण केली. जॉर्ज डॉकरेलने नाबाद 34 आणि मार्क अडेर नाबाद 23 यांनीअफलातून फटकेबाजी करत आयर्लंडला विजयाच्या जवळ नेले.
यावेळी अखेरचे षटक टाकण्यासाठी नवोदित व केवळ दुसराच सामना खेळत असलेला वेगवान गोलंदाज उमरान मलिककडे चेंडू सोपवला. उमरानने पंड्याचा विश्‍वास सार्थ ठरवला व संघाचा विजय साकार केला. अखेरच्या षटकांत आयर्लंडला 6 चेंडूत 17 धावांची गरज होती. मात्र, त्यांचा अनुभव कमी पडला तसेच उमरानने भेदक गोलंदाजी केली व आयर्लंडच्या फलंदाजांना मोठे फटके खेळू दिले नाहीत. भारताने गोलंदाजी करताना 20 अवांतर धावा दिल्याने सामना अखेरच्या षटकापर्यंत खेचला गेला. या सामन्यासह भारताने दोन सामन्यांची ही मालिका 2-0 अशी जिंकली. यंदाच्या मोसमात भारताचा हा सलग पाचवा व्हाईट वॉश विजय ठरला आहे.
हुडाचे अफलातून शतक
भारताचा नवोदित फलंदाज दीपक हुडा याने आयर्लंडविरुद्धच्या दुसऱ्या सामन्यात शतक फटकावले व टी-20 क्रिकेटमधील आपले पहिले शतक साकार केले. हिटमॅन रोहित शर्मा, लोकेश राहुल व सुरेश रैनानंतरचा चौथा फलंदाज ठरला आहे. रोहितने टी-20 क्रिकेटमध्ये 4, राहुलने 2 तर रैनाने एक शतक फटकावले आहे.
संक्षिप्त धावफलक –
भारत – 20 षटकांत 7 बाद 225 धावा. (दीपक हुडा 104, संजू सॅमसन 77, अवांतर 20, मार्क अडेर 3-42, जोश लिटील 2-38, क्रेग यंग 2-35). आयर्लंड – 20 षटकांत 5 बाद 221 धावा. (अँड्रयू बालबर्नी 60, पॉल स्टर्लिंग 40, हॅरी टेक्‍टर 39, जॉर्ज डॉकरेल नाबाद 34, मार्क अडेर नाबाद 23, रवी बिष्णोई 1-41, उमरान मलिक 1-42, भुवनेश्वर कुमार 1-46, हर्षल पटेल 1-54).
