मुंबई : ठाकरे गटाचे नेते आदित्य ठाकरे यांनी मुख्यमंत्री एकनाथ शिंदे यांना हिंमत असेल तर वरळीतून माझ्याविरोधात लढा, असे थेट आव्हान दिले आहे. आदित्य ठाकरेंच्या याच आव्हानानंतर शिंदे गटातील नेते चांगलेच आक्रमक झाल्याचे पाहायला मिळत आहे. आदित्य ठाकरेंच्या आव्हानानंतर आरोग्यमंत्री तानाजी सावंत यांनी आदित्य ठाकरेंवर खोचक टीका केली आहे.
राज्यात चार वेड्याचे रुग्णालयं आहेत. या रुग्णालयांत जागा असेल तर मी त्यांना रुग्णालयात पाठवण्यास तयार आहे, असे तानाजी सावंत म्हणाले आहेत. ते आज सोलापुरात बोलत होते. “सध्या माझ्याकडे आरोग्य खाते आहे. माझ्याकडे सध्या चारच मेंटल हॉस्पिटल्स आहेत. या ठिकाणी कोठे जागा शिल्लक असेल तर त्या ठिकाणी त्यांची नक्कीच नियुक्ती केली जाईल. ज्यांच्या मेंदूवर परिणाम झालेला असेल, त्यांना ताबडतोब वेड्यांच्या दवाखान्यात दाखल करावे, असा सल्ली मी आमच्या मुख्यमंत्र्यांना देणार आहे. अशा पद्धतीने आपण आदित्य ठाकरेंना वेड्याच्या रुग्णालयात दाखल करू,” असे तानाजी सावंत म्हणाले.
याआधी तानाजी सावंत सोलापूरमधील गुंडेश्वर मंदिराच्या जिर्णोद्धार कार्यक्रमात बोलत होते. यावेळी बोलताना त्यांनी शिंदे गट आणि भाजपा सरकारच्या मीच फाऊंडर आहे, असा दावा केला. “२०१९ साली मातोश्रीवर जाऊन मीच अगोदर आव्हान दिले होते. माझ्यावर अन्याय का करण्यात आला, याचे मला उत्तर द्या, असा जाब मी मातोश्रीवर जाऊन विचारला होता. तसेच माझ्या प्रश्नाचे उत्तर देणार नसाल, तर त्याचे परिणाम तुम्हाला भोगावे लागेल, असेही मी तेव्हा म्हणालो होतो,” असे तानाजी सावंत म्हणाले.
दरम्यान, आदित्य ठाकरे यांनी मुख्यमनातरी एकनाथ शिंदे यांना थेट आव्हान देत हिंमत असेल तर वरळीतून माझ्याविरोधात लढा, असे म्हटले होते. त्यांच्या या आव्हानाला मुख्यमंत्र्यांनी देखील उत्तर देत मी छोटी आव्हाने स्वीकारत नाही मोठी आव्हाने स्वीकारून यशस्वीपणे पेलले असल्याचे म्हटले होते.
