पिंपरी (अमोल शित्रे) – चिंचवड विधानसभा पोटनिवडणुकीचे बिगुल वाजताच सर्वपक्षीय नेते गुडघ्याला बाशिंग बांधून तयारीला लागले आहेत. भाजपाचा पराभव करण्यासाठी अस्तित्वात आल्याचा दावा करणाऱ्या महाविकास आघाडीतील घटक पक्षांना आघाडी धर्माचा विसर पडला असून नेत्यांनी एकमेकांच्या विरोधातच शड्डू ठोकला आहे. कॉंग्रेस, राष्ट्रवादी कॉंग्रेस आणि शिवसेना उध्दव बाळासाहेब ठाकरे पक्षांच्या स्थानिक नेतृत्वाकडून स्वतंत्र निवडणूक लढण्याचे संकेत दिले आहेत. त्यामुळे महाविकास आघाडीत बिघाडी होण्याची चिन्हे दिसू लागली आहेत.
दिवंगत आमदार लक्ष्मण जगताप यांच्या हयातीत राष्ट्रवादी, कॉंग्रेस, शिवसेना यातील एकाही पक्षाला या चिंचवड विधानसभेवर विजय मिळवता आला नाही. कारण, सर्वसामान्य लोकांशी जोडलेली नाळ आणि मतदार संघातील पक्षांतर्गत व पक्षाबाहेरील कार्यकर्त्यांसोबत जपलेले ऋणानुबंध जगतापांच्या विजयाचे रहस्य राहिले आहे. त्यांच्या निधनानंतर पोटनिवडणुकीत त्यांचे बंधू शंकर जगताप की पत्नी अश्‍विनी जगताप या दोघांपैकी उमेदवारी कोणाला द्यायची, याचा तिढा अजून सुटलेला नाही. तर, भाजपाकडून दोनवेळा झालेल्या पराभवाचा वचपा काढण्यासाठी महाविकास आघाडीतील इच्छुकांनी दंड थोपटून राजकीय मैदानात कसरती सुरू केल्या आहेत.
राज्यात भाजपाला धडा शिकवण्यासाठी 2019 मध्ये राष्ट्रवादी कॉंग्रेस, कॉंग्रेस आणि शिवसेना या तिन्ही पक्षांनी एकत्र बस्तान मांडून सरकार स्थापन केले. दरम्यान, शिवसेनेत उलथापालथ झाल्याने सत्तांतर घडून आले. परंतु, महाविकास आघाडीतील पक्षांनी विरोधात बसण्याचा निर्णय घेऊन राज्यातील शिंदे-फडणवीस सरकारला सळो की पळो करण्याचा निर्णय घेतला. परंतु आता मात्र पोटनिवडणुकीसाठी महाविकास आघाडीतील तिन्ही पक्षांनी स्वतंत्र चूल मांडायला सुरुवात केली आहे. पक्षाकडून आदेश येण्यापूर्वी राष्ट्रवादी कॉंग्रेसच्या काही नेत्यांनी कामाला सुरुवात केली आहे. तर, शिवसेना उध्दव बाळासाहेब ठाकरे पक्षाचे शहरप्रमुख ऍड. सचिन भोसले यांनी देखील उध्दव ठाकरे देतील त्या उमेदवाराला बहुमताने निवडून आणण्याचा निर्धार केला आहे. कॉंग्रेसकडून देखील या निवडणुकीत उमेदवार देण्याची तयारी चालवली असल्याचे शहराध्यक्ष कैलास कदम यांच्या विधानावरून स्पष्ट झाले आहे. त्यामुळे महाविकास आघाडी म्हणून राज्याचे नेतृत्व सांभाळण्यासाठी एकेकाळी पुढे आलेल्या पक्षांमध्ये उभी फूट पडल्याचे चित्र पिंपरी-चिंचवडमध्ये पहायला मिळत आहे.
अंतर्गत बंडाळी भोवणार
चिंचवड विधानसभेवर असलेले भाजपाचे निर्विवाद वर्चस्व कोणालाही नाकारता येणार नाही. खोलवर रुजलेली भाजपाची पाळेमुळे उखडून फेकण्यासाठी महाविकास आघाडीतील पक्षांना वैयक्तीक स्तरावर उमेदवार देऊन चालणार नाही. तसे केले तर स्वतःचेच नुकसान होण्याची दाट शक्‍यता आहे. त्यामुळे महाविकास आघाडी पुरस्कृत एकच उमेदवार देऊन त्याला पाठबळ देणे सर्वांच्या हिताचे ठरेल, असे राजकीय तज्ञ मंडळी मानतात. अन्यथा वैयक्तिक स्तरावर उमेदवार दिल्यास त्यांना विरोधी पक्षांबरोबर अंतर्गत हितशत्रुंचा देखील सामना करावा लागणार आहे. पक्षांतर्गत गद्दारांच्या कुरघोड्या प्रभावी ठरल्यास मतांची विभागणी होऊन पुन्हा भाजपाचे कमळ फुलण्याची शक्‍यता नाकारता येणार नाही, असा निष्कर्ष राजकीय जाणकारांनी व्यक्त केला आहे.
