इंदौर – इंदोर लोकसभा मतदार संघातील खासदार व लोकसभेच्या माजी सभापती सुमित्रा महाजन यांनी लोकसभा निवडणूक रिंगणातून आपली माघार जाहीर केली आहे. आपल्या उमेदवारीबाबत अद्याप पक्षाने निर्णय घेतलेला नाही याचा अर्थ त्यांना इंदौरविषयी निर्णय घेण्यास सध्या जड जात आहे असे दिसते. त्यामुळे आता मी स्वताहूनच या रिंगणातून माघार घेत असून पक्षाने त्यांना हवा तो निर्णय घ्यावा असे काहीसे नाराजीचे सूर काढत त्यांनी या मतदार संघातून माघार घेतली आहे.
भाजपने 75 वर्षावरील उमेदवारांना निवडणूकीच्या रिंगणात न उतरवण्याचे ठरवले आहे. त्याच आधारावर त्यांना उमेदवारी मिळण्याविषयी साशंकता निर्माण झाली होती. त्यामुळेच इंदौरचा निर्णय पक्षाने लांबणीवर टाकला होता. मी माझ्या उमेदवारीतून पक्षाला मोकळे केले आहे असे त्यांनी म्हटले आहे. सुमित्रा महाजन या तब्बल आठ वेळा या मतदार संघातून विजयी झाल्या आहेत. त्यांनी म्हटले आहे की पहिल्या निवडणुकीच्यावेळीही मी पक्षाकडे उमेदवारी मागितली नव्हती. उमेदवारीविषयी पक्षानेच निर्णय घ्यावा अशी पद्धत आहे. आता ते जो निर्णय देतील तो मला मान्य आहे. मी आता स्वताहून या मतदार संघातून माघार घेत आहे. या जागी पक्षाने आता कोणता उमेदवार द्यायचा ते त्यांनी ठरवायचे आहे असेही सुमित्रा महाजन यांनी स्पष्ट केले आहे.