गुरुजींचा संघर्ष संघटनेसाठी की बॅंकेच्या सत्तेसाठी?
कृष्णाकाठचे तात्या गुरुमाऊलीत समेट घडवतील का? : गुरुमाऊलीच्या वादाचा चेंडू राज्याच्या कोर्टात
नगर – गुरुजींच्या संघटनांना फुटीचा शाप कायम असून आदर्श व वेगळेपणाचा नेहमी दावा करणाऱ्या गुरुमाऊलीच्या शिडातही फुटीचे वारे जोरात वाहत आहेत. हा वाद आता राज्याच्या कोर्टात गेला असून कृष्ण काठावरून तात्या हा वाद कसा सोडवणार याकडे जिल्ह्यातील गुरुजींचे लक्ष लागून आहे.
सदिच्छाच्या कारभाराला विरोध करत रावसाहेब रोहकले व बापू तांबे या जोडगोडीने गुरुमाऊलीची स्थापना करत बहुमताने शिक्षक बॅंकेची सत्ता मिळवली. पण रोहकले व तांबे यांचे पहिल्या दिवसापासूनच कुठेच पटले नाही.ज्यांना हे दोघे एकत्र असावेत असे वाटत होते त्यांनी मनापासून प्रयत्न केले पण हे दोघे एकमेकांपासून दूर जात राहिले. हे दोघे एकत्र असू नयेत यासाठीही पद्धतशीर प्रयत्न झाले! रोहकले हे सेवेतून निवृत्त झाल्यावर बॅंकेच्या अध्यक्ष पदावरून पारंपरिक नियमानुसार आपोआप पायउतार झाले. नव्या अध्यक्ष-उपाध्यक्ष निवडीत तांबे-रोहकले असे सरळ गट पडून तांबे गटाने बाजी मारली.
आता हे दोन्ही गट गुरुमाऊलीच्या झेंड्याखाली कागदोपत्री एकत्र दिसत असले तरी मनाने एकमेकांपासून पूर्ण दूर गेले आहेत. तहाची बोलणी सासवडच्या कृष्णकाठी राज्य शिक्षक संघाचे सर्वेसर्वा संभाजी थोरात तथा तात्या यांच्या साक्षीने सध्या सुरू असली तरी खरंच हे दोन्ही गटाने एकत्र येतील ही शक्‍यता कमीच आहे. त्यामुळे रोहकले-तांबे गटात साखरपेरणी होणार की कडू करल्याचीच फोडणी कायम राहणार हे लवकरच दिसेल!
रोहकलेंच्या कुंडलीत शनी-राहू-केतू
रावसाहेब रोहकले यांच्या कुंडलीत सध्या “संप्रवि’या शनी-राहू-केतू ग्रहांची वक्रदृष्टी असून ते रोहकले यांना चुकीचे सल्ले देऊन त्यांची प्रतिमा अधिक खराब करण्यास कारणीभूत ठरत आहेत, असा आरोप तांबे समर्थक करत आहेत.
तांबेंच्या व्यासपीठावर खुषमस्करेच जास्त!
बापू तांबे यांनी बॅंकेची सत्ता ताब्यात घेतली. ही सत्ता कशी मिळवली. त्यांच्या भोवती सारे स्वार्थी व खुषमस्करे कोंडावळे जमा झाले आहे असा आरोप रोहकले समर्थक एका शिक्षक बॅंकेच्या संचालकाने केला.
