पिरंगुट- मांडवखडक (ता.मुळशी) येथील जिल्हा परिषद प्राथमिक शाळेतील शिक्षक गणेश मोरे यांचे हृदयाविकाराच्या झटक्याने निधन झाले. त्यांच्या कुटुंबीयांना डी.सि.पी.एस. योजनेच्या माध्यमातून 10 लाख रुपयांची मदत, ग्रॅज्युएटी मिळावे. तसेच त्यांच्या पत्नीना अनुकंपा तत्वावर कामावर घ्यावे, अशी मागणी शिवसेना, युवासेना आणि महिला आघाडीच्या वतीने करण्यात आली. यासंदर्भात व इतर मागण्यांचे निवेदन गटशिक्षण अधिकारी माणिक बांगर व शिक्षण विस्तार अधिकारी सुदाम वाळुंज यांना देण्यात आले.
या निवेदनात नमूद आहे की, धरणग्रस्त भागातील इयत्ता 10 वीच्या मुलांना बोर्डाच्या परीक्षेसाठी पौड हे सेंटर असून त्यांना 30-40 कि.मी प्रवास करून इथे यावे लागते अथवा पौड येथे मुक्कामी राहावे लागते. ज्यामुळे विद्यार्थी गुणवत्तावर परिणाम होतो. त्यासाठी धरणग्रस्त भागात 10 वी साठी स्वतंत्र असे परीक्षा केंद्र द्यावे, अशी मागणी करण्यात आली. यावेळी युवासेना जिल्हा अधिकारी अविनाश बलकवडे, जिल्हा विद्यार्थी संघटक राम गायकवाड, भोर समनव्यक कैलास मारणे, विशाल पवार, ज्योती चांदेरे, संतोष तोंडे, नवनाथ भेगडे, कावेरी साठे, शिवाजी बलकवडे, संतोष चौधरी, शोभा सावरकर, अर्जुन दहिभाते, रोहिदास धुमाळ आदी उपस्थित होते.