Stock Market: भारतीय शेअर बाजारत आज व्यवहाराच्या दुसऱ्या सत्रात जोरदार तेजी पाहायला मिळाली. अमेरिका आणि इराण यांच्यात लवकरच करार होण्याची शक्यता असल्याच्या वृत्तामुळे जागतिक बाजारात कच्च्या तेलाच्या (Brent Crude) किमतीत मोठी घसरण झाली, ज्याचा सकारात्मक परिणाम शेअर बाजारात दिसून आला. दिवसाअखेर सेन्सेक्स ९४०.७३ अंकांच्या (१.२२%) वाढीसह ७७,९५८.५२ वर, तर निफ्टी २९८.१५ अंकांच्या (१.२४%) वाढीसह २४,३३०.९५ वर बंद झाला. दिग्गज शेअर्सची कामगिरी – (Stock Market) जागतिक बाजारातील सकारात्मक संकेतांमुळे गुंतवणूकदारांचा उत्साह वाढला. सेन्सेक्समधील ३० पैकी आघाडीच्या शेअर्समध्ये इंटरग्लोब एव्हिएशन (IndiGo), ट्रेंट, एशियन पेंट्स, एसबीआय (SBI) आणि एचडीएफसी बँक (HDFC Bank) यांचा समावेश होता. या शेअर्समध्ये ३% ते ७% पर्यंत वाढ नोंदवण्यात आली. Stock Market दुसरीकडे, रिलायन्स इंडस्ट्रीज, लार्सन अँड टुब्रो (L&T), पॉवर ग्रिड, एनटीपीसी (NTPC) आणि एचसीएल टेक (HCL Tech) यांसारख्या दिग्गज शेअर्समध्ये १% ते १.८०% पर्यंत घसरण पाहायला मिळाली. क्षेत्रीय कामगिरी (Sectoral Update) बँकिंग क्षेत्रात मोठी खरेदी झाली. निफ्टी पीएसयू बँक, प्रायव्हेट बँक आणि निफ्टी रियल्टी निर्देशांकांनी उत्कृष्ट कामगिरी केली. निफ्टी एफएमसीजी (FMCG) क्षेत्रात आज सुस्ती पाहायला मिळाली. तसेच व्यापक बाजारपेठेतही तेजीचे वातावरण होते. निफ्टी मिडकॅप १.७६% आणि निफ्टी स्मॉलकॅप १.९३% वाढीसह बंद झाले. कच्च्या तेलात ६% पेक्षा जास्त घसरण – (Stock Market) आंतरराष्ट्रीय बाजारात ब्रेंट क्रूडचा मे वायदा ६.९४% नी कोसळून १०२.२४ डॉलर प्रति बॅरल वर आला आहे. इराण आणि अमेरिकेतील तणाव निवळण्याच्या संकेतांमुळे तेलाच्या किमतींना लगाम बसला असून, भारतासारख्या तेल आयातदार देशासाठी ही मोठी दिलासादायक बातमी आहे. तज्ज्ञांचे मत: ‘निवडक’ गुंतवणुकीचा सल्ला – जिओजित फायनान्शिअल सर्व्हिसेसचे संशोधन प्रमुख विनोद नायर यांच्या मते, “जागतिक स्तरावर भू-राजकीय तणाव कमी झाल्याने आणि तंत्रज्ञान क्षेत्रातील कंपन्यांच्या चांगल्या निकालांमुळे बाजार वधारला आहे. मात्र, कच्च्या मालाच्या वाढत्या किमती आणि परकीय चलनाचा धोका अजूनही कायम आहे. त्यामुळे गुंतवणूकदारांनी सध्याच्या परिस्थितीत सरसकट खरेदी न करता ‘निवडक’ (Selective) शेअर्सवर लक्ष केंद्रित करणे फायदेशीर ठरेल.” बाजारात तेजी का आली? शेअर बाजारातील या उसळीचे मुख्य कारण म्हणजे मध्यपूर्वेतील (Middle East) तणाव कमी होणे हे आहे. अमेरिकेचे राष्ट्राध्यक्ष डोनाल्ड ट्रम्प यांनी स्पष्ट केले आहे की, होर्मुजच्या सामुद्रधुनीतून (Strait of Hormuz) जाणाऱ्या जहाजांना मार्ग दिला जाईल. त्याचबरोबर अमेरिकेचे परराष्ट्र मंत्री मार्को रुबिओ यांनी “ऑपरेशन एपिक फ्युरी” (Operation Epic Fury) संपल्याची घोषणा केली आहे. या सकारात्मक बातम्यांमुळे विस्कळीत झालेली पुरवठा साखळी (Supply Chain) पुन्हा पूर्वपदावर येईल अशी आशा निर्माण झाली असून, गुंतवणूकदारांचा आत्मविश्वास वाढला आहे.