वाघोली, -राज्यात हरवलेल्या बालकांच्या व महिलांच्या संदर्भात ‘ऑपरेशन मुस्कान -13’ ही विशेष शोधमोहीम 1 डिसेंबर ते 30 डिसेंबर 2024 या कालावधीत राबविली जाणार आहे. याचदरम्यान पुणे शहरातून हरविलेल्या बेपत्ता बालके (18 वर्षांखालील) व महिलांचा (18 वर्षांवरील) शोध घेण्यासाठी ही मोहीम राबविण्यात येणार आहे.
या मोहिमेच्या अनुषंगाने अनैतिक मानवी वाहतुक व्यापार प्रतिबंध कक्ष, गुन्हे शाखा येथे शहरातील सर्व परिमंडळातील पोलिस ठाणे निहाय टीम तयार करण्यात आली आहे. ही टीम पुणे शहरातील सर्व पोलीस ठाण्यांना भेट देऊन या मोहिमेबाबत पोलीस ठाण्यातील अधिकारी व कर्मचारी यांना समक्ष भेटून संबंधित मोहिमेबाबत माहिती देणार आहेत.
वरिष्ठ पोलीस निरीक्षक हे आपल्या पोलीस ठाणे स्तरावर या मोहिमेसाठी एक अधिकारी व तीन पोलीस कर्मचारी अशी विशेष टीम तयार करून त्यांच्याकडून ऑपरेशन मुस्कान-13 द्वारे हरविलेल्या सर्व बालकांचा व 18 वर्षांवरील महिलांचा प्रभावीपणे शोध घेतला जाणार आहे.
