पुणेः आळंदी-पंढरपूर रस्त्यावरील जेजुरी गावाच्या नजीक असलेल्या बेलसर फाट्याजवळ एसटी बस व दुचाकीचा भीषण अपघाताची घटना काल दुपारी साडेतीन वाजण्याच्या सुमारास घडली. या अपघातामध्ये दुचाकीवरील तिघांचा मृत्यू झाला आहे. रमेश किसन मेमाणे (वय ६०), संतोष दत्तात्रय मेमाणे, (वय ४०) व पांडुरंग दामोदर मेमाणे (वय ६५) अशी या तिघांची नावे आहेत. पारगाव मेमाणे येथील बोरमाळ वस्ती येथील ते रहिवाशी आहेत.
मिळालेल्या माहितीनुसार, जेजुरी-सासवड रस्त्यावरील बेलसर फाटा दरम्यान दुचाकीवरील तिघे जण रस्ता ओलांडत असताना एसटी बसने या तिघांना जोराची धडक दिली. एसटी चालकाने गाडीचा वेग कमी करून बस रस्त्याच्या खाली घेण्याचा प्रयत्न केला. मात्र, दुचाकी ही बस खाली गेल्याने दुचाकीला फरफटत नेले. या अपघातानंतर तिघांना जेजुरी ग्रामीण रुग्णालयात दाखल करण्यात आले होते. मात्र, उपचारापूर्वीच डॅाक्टरांनी त्यांना मयत घोषित केले.
गावावर शोककळा
या अपघातामध्ये मयत झालेले तिघेजण मारगाव मेमाणे येथील बोरमाळ वस्तीचे राहणार होते. अपघातामध्ये तिघांच्या जाण्याने वस्तीसह गावावर शोककळा पसरली आहे.
झेंडवाडीनजीक अपघात
गेल्या काही दिवसांपूर्वी झेंडेवाडी नजीक एसटीने दुचाकीला धडक दिल्याची घटना घडली होती. या अपघातामध्ये दुचाकीवरील जेष्ठाचा जागीच मृत्यू झाला होता. ही अपघाताची घटना ताजी असतानाच आता आणखी एक अपघाताची घटना घडली आहे.