पुणे – सोलारीस क्लब आयोजित वरिष्ठ पुरुष राष्ट्रीय टेनिस स्पर्धेत पुण्याच्या नितीन किर्तने, केतन धुमाळ, अजय कामत यांच्यासह नाशिकच्या श्रीकांत पारेख व एम. सुरेश यांनी एकेरीमध्ये आपापल्या गटाचे विजेतेपद मिळवले.
35 वर्षांवरील गटामध्ये पात्रता फेरीतून मुख्य फेरीमध्ये प्रवेश केलेल्या पुण्याच्या केतन धुमाळने पुण्याच्याच नीरज आनंद याचा 6-3, 6-3 असा पराभव केला. 45 वर्षांवरील गटामध्ये नितीन किर्तनेने मुंबईच्या नीलकंठ डाबरेचा 6-2, 6-1 असा पराभव केला.
55 वर्षांवरील गटात पुण्याच्या अजय कामतने निर्मल कुमारचा 6-0, 6-0 असा सरळ सेटमध्ये पराभव करून सलग दुसऱ्या वर्षी या गटाचे विजेतेपद मिळवले. 65 वर्षांवरील गटात एम. सुरेशने अब्दुल हनिफचा 6-4, 6-4 असा पराभव करून या गटाचे विजेतपद संपादन केले. 70 वर्षांवरील गटात श्रीकांत पारेखने गंगाधरन एस. यांचा 6-2, 6-0 असा पराभव केला.
दुहेरीच्या 55 वर्षांवरील गटामध्ये अजय कामत व जयंत कढे या जोडीने मेहर प्रकाश व चेतन देसाई या जोडीचा 6-3, 6-2 असा पराभव करून विजेतेपद संपादन केले. 45 वर्षांवरील गटात नितीन किर्तने व संदीप किर्तने या बंधू जोडीने मुकूंद जोशी व आर. कुलकर्णी या जोडीचा 6-0, 6-1 असा पराभव करून विजेतेपद संपादन केले. 35 वर्षांवरील गटामध्ये पुण्याच्या मंदार वाकणकर व अभिषेक ताम्हाणेने विजय आनंद व अफरोझ खान या जोडीचा 6-3, 6-3 असा पराभव केला.
स्पर्धेचे पारितोषिक वितरण सोलारीचे संचालक जयंत पवार आणि सोलारीस क्लबचे सीईओ हृषीकेश भानुशाली यांच्या हस्ते करण्यात आले. सर्व विजेत्या आणि उपविजेत्या खेळाडूंना करंडक आणि स्मृतिचिन्ह देण्यात आले.